Pagka-bise mayor gidesisyonan sa taga Barangay Cambinocot
CEBU, Philippines - Human sa upat ka adlaw ug makutas nga pagpaabot nahuman na gyud pag-eskutenyo ang nahibiling tulo ka clustered precincts sa Cebu City kagabii alang sa kung kinsa gyuy mogawas nga mamahimong bise mayor tali nila ni konsehal Edgar Labella ug bise mayor Agustus Joy Young.
Kagahapon sa dayon nang kilom-kilom nasugdan ang pagtiwas sa tulo ka clustered precincts nga wala mabasa tungod sa depektosong mga compact flash cards, apan sa pag-abot sa reserbang CF cards kagahapon napadayon ang pag-ihap sa botos. Ang nauwahi og basa nga mga botos naggikan sa barangay Cambinocot, barangay Mambaling ug barangay Luz.
Pagkahuman pagbasa sa barangay Luz ug Mambaling mikubos ang labaw ni Labella gikan sa 371 ka botos nahimo na lang kini nga 298 batok ni Young.
Si Mayor Michael Rama sa pakighinabi sa mga tigbalita kilid sa canvassing area sa Cebu City Hall kagabii miingon nga mas malipay siyang si Labella nga iyang kaalyado ang modaog pagka-bise mayor.
Hinuon malaumon nang daan ang campaign manager sa Team Rama nga si Joey Daluz nga dili na gyud makaapas pa si Young bisan og pilde sa pagkamayor si Rama sa barangay Cambinocot tungod kay ang maong barangay silingang barangay diin magpuyo si Labella nga mao ang Bacayan.
Ang Cambinocot matud pa adunay 972 rehistradong botante apan ang Board of Election Inspectors miingon nga 838 ra niini ang nakabotar apan makaapektar pa sa labaw ni Labella ang mga botos gikan sa maong barangay.
Sa katapusan pag-eskutenyo kagabii milabaw lang si Labella og 184 ka botos kontra ni Young sa kinatibuk-an niyang botos nga 203,267 batok kang Young nga 203,083. (BANAT NEWS)
- Latest
