ANAD naglaraw nga ipa-impeach si Comelec Chairman Brillantes

CEBU, Philippines - Gilusad sa ANAD Partylist ni Kong. Pastor Jun Alcover Jr., ang kampanya aron ipa-impeach si Commission on Elections  Chairman Sixto Brillantes.

Si Alcover mipahibawo niining ilang laraw sa usa ka interbyu sa sibyaanang dyDD nga nag-ingong “Impeach Comelec Chairman Brillantes Now” campaign.

Si Alcover nanawagan sa mga supporters ug miyembro sa ilang pundok ug ubang sektor pagsalmot ug suportahan ang ilang kampanya.

Si Alcover padayung mikwestyon ug misaway sa desisyon sa Comelec pag-disqualify sa Anad Partylist nga makasalmot sa nagsingabot nga 2013 Elections tungod kay alang niya wala kini basehanan.

Gani gihulagway niya si Brillantes nga nakigkunsabo sa mga militanteng partylist sama sa Bayan Muna, Gabriela, Anakpawis ug uban pang gihulagway ni Alcover nga kaalyado sa mga komunista nga naglingkod na karon sa Kongreso.

Kagahapong adlawa gipahibawo ni Alcover ang ilang pagduso og petisyon sa Korte Suprema nga nagkwestyon sa desisyon sa Comelec pag-disqualify sa Anad Partylist.

Masaligon si Alcover nga makakuha og Temporary Restraining order kon TRO batok sa desisyon sa Comelec.

Si Alcover mipasabot nga wala na lang sila moduso og motion for reconsideration sa Comelec en banc may labot sa maong disqualification tungod kay gusto nilang pamatud-an nga depektoso ang maong gipakanaug nga desisyon sa Comelec ug gusto nilang bakwion kini sa Labaw’ng Hukmanan. (BANAT NEWS)