20 ka establisamento gipasidunggan sa Mandaue

CEBU, Philippines — Mokabat sa 20 ka mga establisamento ang gihatagan og pasidungog atol sa Mandaue City Taxpayers Awards Night nga gipahigayon diha sa Radison Blu Hotel sa Siyudad sa Sugbo.

Si suspended mayor Jonas Cortes apil sa nitambong ug mihatag og mensahe nga nagpadayag sa iyang pagpasalamat sa mga magpapatigayon sa dakbayan sa Mandaue sa ilang dakong natampo sa pagpalambo sa dakbayan.

Ang pasidungog gilangkoban sa napulo ka mga Top Corporate Real Property Tax, napulo ka mga Top Individual Real Property tax ug laing napulo ka mga Top Corporate Business Taxpayers.

Si Mandaue City Treasurer Regal Oliva maoy nangulo sa maong kalihokan uban usab ni Atty August Lizer Malate, pangulo sa Business Permit Licensing Office (BPLO) sa dakbayan sa Mandaue.

Lakip sa nitambong sa awards night mao si acting Mandaue City Mayor Glenn Bercede uban sa mga sakop sa konseho ug mga Department Head.

Si Atty Oliva sa iyang mensahe mipadayag sa pag-ila sa siyudad sa malampuson nga local revenue generation ug kini naangkon sa siyudad tungod usab sa hugot nga pagpakig-alayon sa mga magpapatigayon nga matinud-anong nagtuman sa ilang obligasyon.

Samtang si Bercede sa iyang bahin nanghinaut nga padayon nga magtinabangay ang lokal nga kagamhanan ug pribadong sektor nonot sa dakung kaakohan sa paghatag og maayong kaugmaon sa mosunod pa nga henerasyon.

Nagkanayon si Bercede nga ang kagamhanan sa dakbayan walay hunong sa pagpaningkamot alang sa kalampusan ug kalambuan sa dakbayan. (BANAT NEWS)