Firecracker display area sa SRP gibuksan na

CEBU, Philippines — Gibuksan kagahapon ang firecracker display area diha sa South Road Property sa Dakbayan sa Sugbo diin gipaniguro sa mga negosyante nga nituman sila sa safety protocol aron malikay sa aksidente.

Ang maong pagbukas sa mga paninda nga pabuto niadto untang adlaw nga Lunes apan wala mahinayon hinungdan nga kini kagahapon giablihan.

Matud sa mga magpapatigayon nalangay og duha ka adlaw ang pagpamaligya nila tungod kay mao pay paghuman sa ilang permit aron sila makapamaligya.

Ang kagamhanan sa siyudad nipatuman og  “No Permit, No Display Policy” sa pagbaligya og mga pabuto.

Nasayran nga niabot sa 16 ka sakop sa grupo sa firecracker vendors sa siyudad ang nahatagan og permit.

Si Carmelita Montebon, usa sa mga nahatagan og permit nipadayag nga adunay daghang supply karon sa mga pabuto, adunay gikan sa Bulacan ug Lapu-lapu City.

Gipadayag ni Montebon nga mas barato ra ang presyo karon sa mga pabuto tungod kay adunay daghan supply.

Ang mga manindahay naniguro nga safety ang ilang pagpamaligya ug nisunod sa mga protocol nga giimplementar sa otoridad.

Samtang ang presidente sa Association sa mga firecracker vendors Roberto Sisa nibutyag nga aduna sila’y mga fire extinguisher, pundong tubig, bas ug nag-amping sila nga dili motumaw ang mga dautang panghitabo.

Hugot usab nga gidili ang pagpanigarilyo, pag-testing sa mga pabuto diha sa firecracker display area.

Gidasig usab ang mga mamalitay nga kong mahimo dili magdala og mga bata kon sila mamalit og pabuto.

Sa laing bahin, dili tugotan ang pagbaligya og pabuto sa Dakbayan sa Talisay. Kini maoy gipahibawo ni Chief Inspector Alvin Torion, hepe sa kabomberohan sa siyudad.

Iyang gipasabot nga walay lugar nga naila ang lokal nga kagamhanan aron maka-display sa pagbaligya og pabuto.

Matud ni Torion nga pila na katuig ang Dakbayan sa Talisay walay firecracker display o lugar nga tapokanan diin adto ibaligya ang mga pabuto.

Ang gitugotan lang mao ang pyrotechniques nga anha ra usab ang display sa gawas  sa parking area sa mall.

Sa pagkakaron, padayon nga modawat sa aplikasyon ang siyudad alang sa special permit diin ang kataposan nga adlaw sa ilang paghatag og special permit karong Disyembre 30, 2024. (BANAT NEWS)