Personnel sa intelligence sa LCPO positibo sa drug test

CEBU, Philippines — Gipaabot karon ang resulta sa confirmatory test sa usa ka sakop sa Intelligence Operative sa Lapu-Lapu City Police Office (LCPO) human nagpositibo kini sa paggamit sa ilegal nga drugas atol sa gipahigayon nga random drug test sa niaging bulan niining tuiga. 

Ang gihimo nga random drug test sa kapolisan kabahin kini sa internal cleansing program sa Philippine National Police.

Si Police Lieutenant Colonel Christian Torres, tigpamaba sa LCPO nagkanayon nga ang maong intelligence operative nga nagranggo og Police Sergeant ang usa sa 50 nila ka mga personnel nga gipaubos sa random drug test sa niaging bulan.

Matud ni Torres nga samtang nagpaabot pa sa confirmatory test ang unit head sa maong personnel ang tahasan sa paghukom kon ibutang ba ang maong intelligence operative sa holding unit o tangtangon kini isip sakop sa maong unit.

Si Torres nagkanayon nga ilang gipaabot ang confirmatory test gikan sa crime laboratory sa ulohang buhatan ug kon magpositibo gihapon posibleng ipaubos na kini sa dismissal proceeding.

Nasayran nga sa nagpadayon nga random drug test sa mga polis sa LCPO niadtong niaging Martes, Disyembre 18, 2024 laing 50 na usab ka polis sa LCPO ang gipaubos sa random drug test.

Sa laing bahin, giila ang Consolacion Police Station nga top performer sa Anti-Illegal Drug ug Gambling operations.

 Base sa natala sa Cebu Provincial Police Office (CPPO) sugod sa Enero 1, 2024 hangtud sa Nobiyembre 30, 2024 ang Consolacion Police Station maoy top 5 performer police station nga municipal police station ubos sa pagpangulo ni Police Lieutenant Colonel Eunil Avergonzado. (BANAT NEWS)