Lima ka tawo nga nalambigit sa derby sa kaka sikop

CEBU, Philippines — Lima ka tawo ang nadakpan sa kapolisan sa Mambaling Police Station sa Cebu City Police Office human naaktohan nga nag-derby og kaka diha sa Sitio San Roque, Barangay Basak San Nicolas, Siyudad sa Sugbo niadtong Martes sa gabii.

Ang mga nadakpan mao sila alyas “Chito”, 39-anyos, taga Sitio Lower Yati, Barangay Quiot, alyas “Raffy”, 34-anyos, taga Sitio Upper Greenbelt, Barangay Quiot, alyas “Cris”, 28-anyos, taga High Tagunol, Back Fatima, Barangay Basak Pardo, alyas “Omi”, 40- anyos, taga Colonel Tabada Street, Barangay Basak San Nicolas ug alyas “Jake”, 31- anyos, nagpuyo sa Sindolan Purok 1, Dakbayan sa Naga.

Ang Mambaling Police Station nakadawat kini og reklamo kalabot sa derby sa kaka diha sa naasoy nga lugar dali kining girespondehan sa kapolisan ug nsikop ang mga suspetsado.

Nasakmit sa kapolisan ang duha ka improvised small box nga adunay 20 ka buhi nga kaka, usa ka improvised spider fighting table nga gigamit isip arena.

Nakompiska usab sa kapolisan ang kwarta nga P900 nga pusta sa mga suspetsado. (BANAT NEWS)