Magpale nitapon sa kampo ni kongresista Frasco

CEBU, Philippines — Ang incumbent nga konsehal sa siyudad sa Danao nga si konsehal Miguel Magpale ang nitapon ngadto sa kampo ni kongresista Duke Frasco.

Si Frasco mi-post og hulagway sa iyang facebook page kagahapong adlawa kalabot sa pagpanumpa ni Magpale ug Atty. Jorge Cane ug uban pa nga membro sa Team Danao.

Si Magpale usa kini ka kanhi bokal sa Probinsya sa Sugbo ug anak ni kanhi bise gobernador Agnes Magpale.

Sa niaging eleksyon milansar kini pagka konsehal sa siyudad sa Danao ubos sa partido sa Barug Alang sa Kauswagan ug Demokrasya (BAKUD) nga gipangulohan sa mga Durano sa kinto distrito.

Ang mga Durano, kontra sa politika sa mga Garcia.

Si Frasco nga bana ni kanhi Liloan Mayor ug Tourism Secretary Christina Garcia -Frasco, milansar pagkakongresista ug midaog sa kinto distrito diin iyang kaatbang si kanhi kongresista Red Durano.

Ang Banat News, misuway pagkuha sa komento o pamahayag ni Magpale kalabot niini apan wala pay nakuha nga tubag sa pagsulat ning balita.

Samtang mingaw ang ikaduhang adlaw sa pagduso og Certificate of Candidacy sa Dakbayan ug Lalawigan sa Sugbo kagahapon,Miyerkules.

Sa unang adlaw aduna nay miduso nga tulo nga naglakip sa incumbent congressman PJ Garcia sa 3rd District, Cariaga Salvador pagka House of Representative sa 4th District ug Camarillo Coysseus isip Sangguniang Panglungsod sa 2nd District.

Samtang sa buhatan sa Comelec sa Dakbayan sa Sugbo, nagmingaw gihapon, apan sa unang adlaw adunay usa nga niduso nga mao ang usa ka taxi driver nga si Abraham Abdon Verdida nga molansar pagka konsehal sa Dakbayan sa Sugbo sa South District.

Si Migumi Tapia, Election Assistant sa Comelec miawhag sa tanang mga aspiring candidates nga sundon lang tanan ang mga kinahanglanon sa ilang mga dokumento aron dili sila magbalik-balik.

Dugang ni Tapia, nga tugotan lang nila nga duha ka mga tawo ang mokuyog sa mga aspiring candidates nga moduso sa ilang COC. —Rowena Capistrano (BANAT NEWS)