Dalaw nisuway og palusot og kontrabando sikop
CEBU, Philippines — Nabalhog sa prisohan ang usa ka 48-anyos nga babaye'ng dalaw human kini nasakpan nga mopalusot unta og kontrabando sulod sa Mandaue City Jail Male Dormitory niadtong Sabado sa buntag, Pebrero 15, 2025.
Ang nadakpan mao si alyas “Lorna”, 48-anyos, lumad nga taga Purok 2, East Balabag, Lungsod sa Valencia, Probinsiya sa Negros Oriental.
Base sa taho sa Mandaue City Jail Male Dormitory nga ang babaye'ng duty searcher niadtong higayona nagpahigayon og regular strip/cavity search sa mga babaye'ng bisita sulod sa female searching room.
Atol sa strip/cavity search sa duha ka babaye'ng bisita nadiskubrehan nga si Lorna aduna kini dala nga duha ka medium-sized sachet nga shabu.
Si Lorna mobisita unta sa kaipon niini nga PDL nga si alyas “Juncris” kinsa napriso sa jail dormitory niadtong December 6, 2023 sa kasong kalapasan sa Section 5 ug 11, Article II sa Akta Republika 9165 kun “ Comprehensive Drugs Act of 2002”.
Ang intelligence ang investigation unit nisumite sa mga nakuhang kontrabando ngadto sa Philippine Drug Enforcement Agency-7 alang sa laboratory examination.
Gipalawoman sa Mandaue City Jail Male Dormitory ang imbestigasyon maong insidente ug gikatakda nga pasakaan og kaso sa nahimo niining kalapasan. (BANAT NEWS)
- Latest
