Nagpanakla sa kahinam, gipapriso

CEBU, Philippines — Usa ka lalaki ang gipapriso tungod sa pagpanakla niini sa usa ka dalaga niadtong Huwebes , diha sa dakbayan sa Mandaue.

Ang gibalhog mao ang 24 anyos nga lalaki.  Ang biktima nga 22-anyos nga dalaga mireklamo sa kapolisan human matud pa gibastos siya sa suspek.

Sumala pa sa dalaga,  nag-atang diha sa gawas sa apartment nga iyang gipuy-an sa Barangay Tabok sa Siyudad sa Mandaue ang suspek nga susama og dunay gipaabot.

Sa iyang pag-abot,  gikatahong gikuptan sa suspek ang iyang kamot  ug nagpanakla dungan sa pag-ingon nga ‘gwapa, lami ug bugdo ang dughan’ sa dalaga.

Ang dalaga dalidaling nisulod sa ilaha tungod sa paminaw niya gibastos siya sa suspek maong nitawag dayun siya sa kapolisan.

Dali sab nga miabot ang mga polis ug gisikop ang suspek tungod sa matud pa pagpangharas niini ngadto sa biktima.

Niadtong Abril 17,2019 nahimo nang balaod ang Bawal Bastos Law, o Republic Act (RA) 11313 o Safe Spaces Act.

Gidili sa maong balaod ang gitawag nga “gender-based sexual harassment (GBSH)” apil niini ang pagbugal-bugal, pagpanaghoy o cat calling, pagpanghangyo og sexual favor ngadto sa babaye o sa lalaki nga makabastos sa hingtungdan.

Makonsiderar sab nga bastos ang manutok sa mata nga dalang uwag, pagtawag sa tawo og laing pangalan, kanang ipabalik-balik pagbutyag ang pangalan o pagmatuod kun siya babaye o lalaki, pagkuha og hulagway nga walay pagtugot, pagpang-harass pinaagi sa online, pagduso og bakak nga reports online aron pahilumon ang tawong gustong dauton.

Apil sa sakop niini ang pagbinastos sa sud sa mga trabahoan, publikong lugar, mga eskuylahan ug bisan pinaagi sa online.

Si bisan kinsa nga mapamatud-ang nakalapas niini ug makombikto, silotan og multa nga dili momenus P5,000 apan dili molapas og P10,000.

Ang kapolisan nagpaabot pa sa reklamante kun iyang pasakaan og kaso ang iyang silingan. — IBM BANAT NEWS