Miyembro sa PhilHealth gipahinumdoman sa binuwan nga bayranan

CEBU, Philippines - Gipasidan-an sa Philippine Health Insurance Corp. (PhilHealth) ang mga miyembro niini kinsa napakyas sa pagbayad sa ilang bayranan sa ikaduhang kuwarter ning tuiga sa pagpangita og paagi nga ila kining mabayran.

Matud pa ni manlalaban Karisma Agraviador, ang Unit Head sa Public Affairs Department sa PhilHealth   nga ang   kapakayas sa hingtungdan sa pagsulbad sa ilang bayranan, magkahulogan sa pagkatangtang usab sa ilang katungod pagpahimus sa mga benepisyo nga alang unta kanila gikan sa PhilHealth sa panahon nga sila magmasakit.

Maoy hinungdan matud pa ni Agraviador nga aron dili maanugon ang kahigayonan nga itunol sa PhilHealth ngadto sa iyang mga miyembro ilabi   na sa gitawag nga individually paying miyembror (IPM) o miyembro nga nagbinugtong pagpas-an sa iyang bayranan sa PhilHealth nga atimanon gyud ang maong obligasyon.

Hinuon matud pa ni Agraviador nga mohatag man ang ilang buhatan og lugway nga labing dugay duha ka buwan apan lapas niini wala na silay ikahatag pa nga laing higayon.

Midugang siya nga ang nakapait man gud kun maatlan nga samtang   dili na aktibo ang maong pagbayad, masulod usab sa hospital ang miyembro gumikan sa wala paabota nga balatian sa lawas.

Sa bahin sa mga miyembro sa PhilHealth nga gibayran sa ilang trabahoan, walay problema ang PhilHealth niini tungod kay ang kompaniya o gitrabahoan man sa maong mga miyembro maoy nag-atiman sa ilang bayranan matag kuwarter o matag tulo ka buwan.

Gumikan sa kamahal karon sa mga bayrunon sa tambalanan ug sa mga doktor nga mag-atiman sa masakiton padayon pang gidasig ni Agraviador ang tanan nga wala pa mahimong miyembro sa PhilHealth sa pagpaningkamot nga mahimong miyembro sa maong ahensya aron makapahimulos sa mga benepisyo nga giandam niini alang sa ilang mga miyembro.