Duha ka dalaga napunggit sa pick-up patay nga milihay sa mi-overtake nga trak

CEBU, Philippines - Duha ka mga babaye ang patay dihang gidaro sa Isuzu D’Max nga milikay sa gikasugat nga sakyanan apan nawad-an hinuon og preno ug didto mopaingon sa mga biktima nga nag-estambay gawas sa tindahan sa sitio Balatik sa Barangay Cawayan lungsod sa Dalaguete kagahapon sa alas 12:30 sa udto.

Ang biktima nga namatay dihadiha mao si Rosalisa Diolan, 47,taga Barangay Panyas ug ang laing biktima nga namatay sa tambalanan mao si Cecilia Lisondra, 49.

Matud ni SPO1 Veronico Centino sa Dalaguete police dihang nahinabi sa Banat News ang Isuzu D’max pickup dunay plakang YGC-530 gimaneho ni Ariel Abonawan,36, taga Tayud lungsod sa Liloan.

Ang drayber sa Fuso Canter nga gikasugat ni Abonawan mao si Rufo Geverola, 40,taga barangay Canbanua lungsod sa Argao. Migawas sa imbestigasyon nga mi-overtake si Geverola sa gisundang motorsiklo apan gikasugat niini ang pickup hinungdan nga mi-brake nalang ang Fuso Canter maong nababag kini sa dalan.

Ang pickup pagkakita sa Fuso Canter nga nababag sa dalan milihay apan nawad-an sad kini og brake ug nalahos ngadto sa mga biktima ug didto na sa giparking nga lain pang sakyanan ug motorsiklo.

Ang duha ka drayber gitanggong sa kapolisan samtang ipaubos sa dugang imbestigasyon sa maong panghitabo. (BANATNEWS)