Establisamento pabutangan og CCTV camera

CEBU, Philippines - Ang tanang balay patigayon, mga buhatan sa kagamhanan ug simbahan   gimandoan nga magpataod og CCTV camera.

Base sa ordinansa nga gipalabang sa konseho, ang pagpataod og CCTV camera dako kaayo og ikatabang sa pagsulbad sa unsa mang krimen ilabi na sa pangawat ug panulis.

Ang maong ordinansa nga gipangamahanan ni Konsehal Demetrio Cortes sa konseho sa maong dakbayan nagbuot nga ang pataoran og CCTV camera mao ang mga bangko, pawnshop, gasoline station, mall, mga tindahan ug uban pa nga nagbukas sa ilang patigayon sulod sa 12 oras sa matag adlaw.

Gawas niini gimando usab sa maong ordinansa nga tanang mga buhatan sa kagamhanang lokal ug nasyonal aron katabangan ang kapolisan sa pagsumpo sa nagtubo nga gidaghanon sa nagkalainlaing krimen sa dakbayan   karong panahona.

Gawas sa mga buhatan sa kagamhanan lakip usab nga painstalahon og CCTV camera mao ang mga simbahan, public plaza ug uban pa.

Sa maong ordinansa si Cortes mipasabot nga ang kakulang sa mga ebidensiya ug kakulang sa personal nga kasayoran sa mga tistigos maoy hinungdan nga maglisod sa pagsulbad ang kapolisan sa nagkadaiyang krimen. (Romeo T. Limpangog/WC)

Festival Congress malampuson

Ni Chester Abadilla

Malampuson kaayo ang gipahigayong Fiesta Pinoy 2011, 1st National Festival Congress didto sa Cebu International Convention Center (CICC) sa siyudad sa Mandaue sa miaging adlaw.

Mao kadto ang labing unang National Festival Congress nga gipahigayon dinhi sa Sugbo nga gitambongan sa kaping 300 ka mga delegado gikan sa nagkadaiyang probinsiya sa nasud.

Tumong sa maong kalihokan mao nga magkabinayloay sa ilang tagsatagsa ka mga kahibalo ang tanang mga festival organizer sa Pilipinas ug makakuha usab og mga kasayoran ang buot nga mopahigayon sa susamang kalihokan.

Usa sa mga nag-unang organizer sa maong kalihokan nga mao si Ricky Ballesteros ang Executive Director sa Sinulog Foundation miingon nga ilang giimbitar ang mga mamumulong nga inila ug pulos  bantugan na kaayong tigpasiugda og mga festival sa nasud.

Dugang pa ni Ballesteros nga ilang nakab-ot ang maong lakang human ang pipila ka mga festival organizer mihangyo nga gusto silang makabaton og seminar kalabot sa festival management.

Gumikan niini malaumon si Ballesteros nga adunay nakat-onan ang mga delegado sa maong Festival Congress ug ila usab kining sagupon ngadto sa ilang tagsa tagsa ka mga lokalidad. (BANAT NEWS)