Gwen mibisita sa mga biktima sa bagyong Ramon

CEBU, Philippines - Gibisitahan ni Governor Gwendolyn Garcia ang 2,388 ka pamilya nga biktima sa bagyong Ramon didto sa duha ka isla sa lungsod sa Sta. Fe luyo sa kadagko sa bawod tungod kay may kulyada sa panahon sa miaging adlaw.

 Kauban sa gobernador nga miadto sa isla sa Kinatarcan ug isla sa Hilantagaan sa lungsod sa Sta. Fe mao sila si 4th district Congressman Benhur Salimbangon, mga Provincial Board member Joven Mondigo ug Sun Shimura, Sta. Fe Mayor Jennifer Ilustrisimo ug ubang mga local nga opisyal.

Matud pa sa gobernador nga ang iyang katuyoan sa paglawig paingon sa maong mga isla mao ang personal nga paghimamat sa kaliboan ka mga biktima sa bagyo ug paghatag usab og mga hinabang niini.

Unang gibisitahan niya ug mga kaubanan mao ang isla sa Hilantagaan mga tunga sa oras nga biyahe sa pump boat gikan sa pantalan sa Sta.Fe ug gisunod ang isla sa Kinatarcan nga mikabat usab og usa ka oras nga biyahe gikan sa   isla sa Hilantagaan.

Gawas sa pagpang-apod-apod og hinabang, ang gobernador uban ni Salimbangon misubo   usab sa duha ka classroom nga school building sa isla sa Kinatarcan nga gilangkuban sa tulo ka mga barangay nga mao ang Bitoon, Hagdan ug Langob.

Si Linmar Cayson ang school principal sa Kinatarcan National High School mapasalamaton kaayo sa gobernadora tungod kay dako kaayo og ikatabang sa mga tinun-an ang gitukod niining school building.

Samtang si Langob barangay captain ug ABC president sa Sta. Fe konsehal Rolando Villacarlos miingon nga naprobahan gyud nila nga wala sila hikalimti sa probinsiya kay gibisitahan sila sa gobernadora bisan og anaa na sila sa kinatumyan sa mapa sa lalawigan sa Sugbo.   - (BANAT NEWS)