Batan-on gipusil, duha napagan, laing usa gipatay sa Talisay

CEBU, Philippines - Duha ang patay usa niini menor de edad ug laing duha ang naangol human sa nahitabong managlahing pagpamusil niadtong Miyerkules sa gabii ug kagahapon sa buntag diha sa duha ka mga barangay sa dakbayan sa Talisay.

Unang insidente nahitabo diha sa Noel Blvd. sa barangay Poblacion sa nahisgutang siyudad mga alas 11:20 sa gabii nga diin wala na makaabot nga buhi sa Talisay City District Hospital ang 17-anyos nga residente sa nahisgutang barangay kinsa nakaangkon og usa ka samad pinusilan sa walang bahin sa dughan.

Samtang giingong napagan usab sila si Rey Torcide Basmayor, 39, kinsa nagisi ang tuong dunggan dihang natapsingan sa bala ug Anthony Salbado Delima, 24, naigo sa tiyan.

Base sa imbestigasyon ang tulo ka mga biktima nagtan-aw sa mga nagduwa og baraha dihang kalit lang mitungha ang duha ka mga lalaking sakay og motorsiklo ug ang angkas niini mipusil ngadto sa 17-anyos.

Ang bala gikan sa batan-on giingong milahos ngadto nila ni Basmayor ug Delima, ang mga gikatahapan mipadagan apan subling mipasalba una pa miikyas. Na-recover sa mga polis gikan sa lugar nga nahitaboan ang duha ka kabhang sa bala sa kalibre .45 nga pistola.

Sa laing bahin, patay si Jessie Maribao, 35, human kini pusila kagahapon sa alas 9:10 sa buntag samtang nagsakay og traysikad diha sa sitio Kilawan barangay Tanke sa nahisgutang siyudad.

Si Maribao nakaangkon og usa ka samad pinusilan sa likod nga bahin sa iyang ulo wala na makaabot nga buhi ngadto sa Talisay City District Hospital.

Base sa imbestigasyon ni PO3 Mikie Espina nga si Maribao wala na motan-aw pa ang drayber sa traysikad kinsay mipusil sa biktima sanglit dali siyang midagan ug nagpakitabang.

Si Supt. Henry Biñas, hepe sa Talisay City Police Station sa pakighinabi niini sa Banat News kagahapon nagkanayon nga usa sa anggulo nga ilahang gisubay karon kabahin sa hitabo mao ang bangi sa fraternity ang nahitabo sa batan-on samtang sa ilegal nga drugas usab ang motibo sa pagpatay kang Maribao. - BANAT NEWS