Dul-an 100 pamilyang nasunogan dili na pabalikon sa T. Padilla?

CEBU, Philippines - Gikabalak-ang dili tanang pamilyang nasunogan sa barangay T. Padilla niadtong milabay’ng bulan ang makabalik sa ilang lugar sumala pa sa ilang barangay kapitan nga si Michael Rallota.

Sumala pa ni Rallota nga gibana-banang moabot lima ngadto sa 10 porsiyento sa 786 ka pamilya ang dili malakip sa re-blocking gumikan kay duna pa kini pending nga mga bayranan sa ilang mga abangan sa yuta.

Ang re-blocking mao ang pag-usa sa usa ka block sa mga managsilingan kaniadto nga naglakip niadtong mga nanag-iya og kaugalingong luna ug kadtong mga nag-abang sa pwesto nga gitarukan sa ilang mga balay.

Gikatahong adunay mga nanggawas nga report diha sa nasunogan nga kadtong wala kaabang o kadtong aduna pay mga pending nga bayranan sa abangan sa luna nga ilang gipuy-an dili na gusto pang pabalikon sa mga tag-iya sa maong mga yuta. Gipaniguro hinuon ni Rallota nga mapangitaan og relocation site ang maong mga apektadong pamilya kun ugaling matinuod ang maong report.

Kining maong problemaha madugang unya sa mga maapektahan sa road widening sa maong dapit nga dili na usab patukoron og balay sa daplin sa dalan.

Si Mayor Michael Rama nagkanayon nga dili mahimong himuong rason ang sunog aron papahawaon ang mga lumolupyo sa maong dapit

“Mangita gyud ta og paagi nga walay maapektohan nga mga pamilya sa re-blocking,” sumala pa ni Rama.

Matud pa sa mayor nga magpadayon ang iyang pagpakighinabi sa mga tag-iya sa yuta aron dili pa modako og problema ug mahimoan kini og dinalian nga solusyon.  (BANAT)