Mga balay sa F. Villa St. demolison para widening

CEBU, Philippines - Pipila ka mga balay sa dalan F. Villa, barangay T. Padilla, siyudad sa Sugbo gikatakdang demolison tungod sa laraw pagpalapad sa karsada. Gitugotan sa konseho si Mayor Michael Rama nga mosulod sa usa ka Memorandum of Agreement (MOA) tali sa mga erediro ni Don Teresio Villa alang sa private-public partnership aron sa pagsulbad sa mga problema sa mga molupyo nga naapektohan sa sunog sa maong lugar.

Mikabat sa 786 ka pamilya o 3,346 ka mga indibidwal ang nawad-an og panimalay tungod sa sunog sa dalan F. Villa sa miaging Agosto 9 ug maoy usa sa labing dakong sunog sa dakbayan sa Sugbo.

Uyon ang 12 ka manununod ni Don Villa sa pagpabilin sa 10 metros nga luna ngadto sa gobyerno alang sa road-widening nga magkonektar sa T. Villa ug F. Villa. Ubos sa MOA, ang gobyerno mohimo og mga drainage system aron mamentinar ang kadalanan.

“Bisan pa kun ang mga Villa ang nanag-iya sa maong yuta, obligado gihapon sila nga papuy-on og balik ang mga nawad-an og mga balay,” matud pa ni Rama.

Dugang pa ni Rama nga dili na angay i-expropriate sa siyudad ang luna tungod kay mahimo lamang hangyoon ang tag-iya niini alang sa luna nga maigo sa pagpalapad sa karsada.

Kini aron kaagian sa mga trak sa bombero, ambulansiya ug bisan unsang sakyanan panahon sa emerhensiya.

Kahinumduman nga nangreklamo ang mga molupyo sa maong dapit gumikan sa kalangan sa pagresponde sa mga bombero. Apan ang kabomberohan miingon nga naglisod sila pagsulod sa maong lugar atol sa sunog gumikan sa kahagip-ot sa lugar. (BANATNEWS)