May deperensya sa pangisip nangilog og van miharos sa 3 sakyanan

CEBU, Philippines - Nautingkay ang kadalanan human ang usa ka lalaking giingong may deperensya sa pangisip ang kalit nga mipuli og maneho sa sakyanang gikargahan kaniya diha sa Psychiatric Ward sa Vicente Sotto Memorial Hospital niadtong milabay’ng gabii.

Ang nalisoan sa pangisip nailhan lang sa ngalan nga “Hener” molupyo sa barangay Villadolid syudad sa Carcar.

Sa pakighinabi sa Banat News sa traffic investigator nga si SPO3 Raman Dreman Budiongan, gihatud unta ni Allan Barawidan si Hener sa maong tambalanan aron patambalan.

Nakalimtan ni Barawidan pagdala ang yawe sa L300 nga adunay plate number GKN-659 apan sa iyang paglingi midagan na ang iyang sakyanan pagawas sa VSMMC. Una pa makagawas ang sakyanan, gidasmagan niini ang awto sa usa ka doktor apan milahos kini og padagan subay sa Osmeña Blvd. padulong sa dalan Colon.

Pag-abot sa eskina sa Sanciangko naapsan kini sa mga traffic enforcers nga gipangayoan og tabang ni Barawidan.

Sumala pa sa report anha lang nahunong ang sakyanan dihang nadasmag na kini sa railings ug dili na makadagan maong naabtan. Apan una pa kini mahunong nakaigo pa kini og laing duha pa ka sakyanan.

Matud pa ni Budiongan nga ang drayber misalig lang nga biyaan ang sakyanan tungod kay si Hener natulog niadtong tungura human maturoki og tambal nga pangpakalma aron unta dalhon og balik sa ilang lungsod.

Si Budiongan nagkanayon nga dili mahimong kasuhan si Hener gumikan sa kahimtang sa pangisip niini.

Butyag usab ni Budiongan nga base sa iyang nakuhang impormasyon si Hener nalisoan sukad nga naoperahan ang iyang asawa nga naabot P80 mil ang bayranan sa ospital. (BANATNEWS)