Bag-ong laya sa city jail monitoron

CEBU, Philippines - Sugod sunod semana, ang mga bag-ong laya sa Cebu City Jail monitoron na sa kapolisan sa dakbayan sa Sugbo aron mapugngan ang ginagmay’ng krimen nga sagad himuon sa mga bag-ong laya.

Si Sr. Supt. Patrocinio Comendador, direktor sa Cebu City Police Office mitug-an atol sa Talakayan sa Isyung Polis (TSIP) sa media center sa Police Regional Office-7 nga iyang butangan og sakop sa Miscellaneous Team ang city jail aron pag-ila sa mogawas aron ma-monitor.

Midugang siya nga ini’g gawas sa bilanggoan sa bag-ong laya kuhaan nila og hulagway ug pasakyon sa service vehicle sa CCPO aron ilang ihatod sa pinuy-anan sa dakbayan.

Apan iyang gitataw nga kun dili hinuon mosakay ang bag-ong laya sa itanyag nga sakyanan dili usab nila kini pugson.

Tuyo sa kapolisan ang pag-monitor sa kalihukan sa bag-ong laya kun gawasnon na kini.

Hinuon, napanglantawan nang daan ni Comendador nga lainon sa pagsabot sa publiko ang maong lakang.

Apan hangyo ni Comendador sa publiko ilabi na niadtong ubang ahensya nga dili lang unta lainon sa pagsabot kay ang ilang tumong niini mao nga walay makahilabot sa mga bag-ong laya gikan sa city jail.

Matud ni Comendador nakab-ot nila ang maong pamaagi niadto lang miaging adlaw atol sa iyang gipatawag nga command conference sa mga opisyal sa CCPO ug sa 11 ka hepe sa mga police station sa dakbayan.

Giklaro ni Comendador nga kaayohan sa mga tinun-an ug inosenteng sibilyan nga sagad mabiktima sa mga bag-ong laya ang maong programa.

“This will make the people more safe in the streets,” matud pa ni Comendador.

Subay sa rekord sa CCPO, ang bulan sa Hunyo hangtod sa Hulyo nga tingbukas sa klase mahitabo ang mga petty crimes sama sa tulis, labni ug kawat nga binuhatan sa mga bag-ong nakagawas gikan sa prisohan.

Gibutyag sa direktor sa kapolisan nga moabot ngadto sa 98 porsiyento sa mga criminal nakahimo og krimen bisan bag-o lang nakagawas sa bilanggoan ug hapit tanan niini nabilanggo tungod sa kasong pagpanulis ug pagpangawat.

Pahugtan usab ni Comendador pag-monitor ang kadalanan nga sagad tapok-an sa mga street gangs karong subling pagbukas sa klase sunod buwan.   – BANAT NEWS