Testigos batok sa bana sa mayor mibakwi sa iyang pamahayag

CEBU, Philippines - Gibakwi sa nagpailang testigos batok sa bana sa mayor sa lungsod sa San Fernando ang nahauna niyang affidavit nga naglambigit kang Ricardo “Nonoy” Reluya Jr. sa pagpatay sa usa ka babaye sa dalan Gorordo, ning siyudad.

Si Rolando Bajao nga nagtrabaho sa usa ka law firm sa Manila mituyo og anhi sa Sugbo kagahapon aron unta i-file ang iyang affidavit of desistance ngadto sa piskaliya.

Apan tungod kay wala siya matagad sa piskaliya, midangop siya sa media.

Si Bajao mipirma sa iyang affidavit of desistance atubangan sa mga sakop sa media pagmatuod nga boluntaryo ang iyang paggawas aron bakwion ang nahauna niyang affidavit nga naglambigit kang Nonoy sa kasong murder tungod sa kamatayon sa usa ka Lalaine Jore sa usa ka tindahan sa dalan Gorordo sa miaging tuig.

Matud ni Bajao sa iyang affidavit nga iyang higala mitawag kaniya niadtong Marso 2 didto sa Manila aron makigkita kaniya didto sa Manila.

Sa dihang misanong siya, atol sa panagkita sa Glorietta sa siyudad sa Makati sa kauluhan, gihaylo siya sa anak ni kanhi Mayor Antonio “Abe” Canoy nga si Mico nga patestigoson aron iduot si Reluya ug ipalutaw nga si Nonoy, bana ni Mayor Lakambini Reluya sa San Fernando, maoy “mastermind” sa kamatayon ni Jore.

Giasoy ni Bajao nga gisaaran siya og P30 mil nga bayad sa iyang pagtestigos batok kang Reluya. Dugang niya nga gibayran siya og pasiunang P15 mil. Gisaad usab niya nga librehon ang iyang tiket sa eroplano gikan sa Manila paingon dinhi sa Sugbo ug balik sa Manila.

Apan matud niya nga nakonsensiya siya sa iyang gibuhat sa dihang iyang nasayran nga ang mga Reluya ug Canoy sa San Fernando nag-atbang diay sa politika ug wala siya magsulti sa matuod.

“Karon pa gyud mi magkita,” si Bajao nagkanayon mahitungod ni Nonoy Reluya.

Kahinumduman, si Jore gipatay sa usa ka sakop sa Philippine Army nga si Felomino Amistad niadtong Pebrero 17, 2009. – BANAT NEWS