Noynoy no. 1 sa mock poll sa mga media ug negosyante

CEBU, Philippines - Migawas nga mananaog sa gihimong ‘mock election’ sa mga sakop sa media ug mga dagkong mga negosyante dinhi sa Sugbo si Senador Benigno ‘Noynoy’ Aquino sa pagka-presidente sa nasud.

Atol sa press conference sa mga sakop sa Cebu Chambers of Commerce and Industry (CCCI), Mandaue Chambers of Commerce and Industry (MCCI) ug Cebu Business Club (CBC) alang sa umaabot nga Presidential Forum sa Waterfront Hotel karong Enero 22, ang mga negosyante uban sa mga sakop sa media nagkauyon nga mopahigayon og ‘mock election’ sa pagkapresidente.

Nangulo sa maong kalihukan mao sila ni CCCI presidente Consul Samuel Chioson, MCCI president Eric Ng Mendoza ug Cebu Business Clup president Dondi Joseph.

Migawas sa maong mock election mao si Aquino nga nakakuha og 10 ka botos, samtang si kanhi Defense Sec. Gilberto Teodoro walo ka botos, ug Senador Manny Villar unom ka botos.

Si Joseph miklaro hinuong ang resulta sa maong kalihukan wala kini nagpasabot makaapekto na kini sa ipahigayon nilang “ Choices and Voices for 2010: An Encounter with the Presidentiables” karong Enero 22, 2010.

Dihang giawhag sa paghulagway sa mubo nga pulong ang matag presidential aspirant si Aquino gilantaw nga ‘prominent hope,’ si kanhi presidente Joseph Estrada gilantaw nga “talented” samtang si Teodoro gihulagway nga “competent” samtang si Brother Eddie Villanueva gihulagway nga “holy.”

Si Villar gilantaw nga “negosyante” ug si Senador Richard Gordon “Subic” nga nakapakatawa sa mga sakop sa media ug sa ubang mga negosyante, giklaro ni Joseph nga nakadayeg siya sa nabuhat ni Gordon sa Subic.

Ang presidential forum nga adunay tema “Choices and Voices for 2010: An Encounter with the Presidentiables” maoy labing una dinhi sa Sugbo.

Ang gipang-imbitar sa maong forum mao ang nag-unang unom ka mga kandidato sa pagkapresidente nga mao sila si Noynoy Aquino, Villar, Estrada, Teodoro, Villanueva, ug Gordon.

Ang presidente sa CCCI, Consul Samuel Chioson nagkanayon nga nabatyagan nila ang “high level of insecurity” sa mga negosyante ug mga botante sa maong mga nangambisyong mahimong presidente sa nasud kun makahatag ba gyud sila og kalambuan ilabi na dinhi sa Sugbo.

Samtang ang presidente sa MCCI nga si Eric Ng Mendoza miingon nga daghan na kaayong nahitabong presidential forum sa kaulohan apan wala pa dinhi sa Sugbo. BANATNEWS)