Eskandalo sa Bogo gihimakak sa mga Salimbangon

CEBU, Philippines - Mihatag og katin-awan ang pamilyang Salimbangon kabahin sa eskandalong mitumaw diha sa lungsod sa Bogo niadtong Nobiyembre 20 ug Disyembre Uno nga gibutang ang mga campaign materials sa mga suporter ni mayoralty candidate Mariqueta Salimbangon Yeung diha sa altar sa milagrosong si San Vicente Ferrer atol sa gipahigayong misa ni Msgr. Jojo Dosado.

Sa gipatawag nga press conference kagahapon, si Yeung pinaagi sa suwat niini nga gibasa ni Monet Aliño mipasabot nga tua siya sa nasud sa India nianang Nobiyembre 20 atol sa gilusad nga prayer rally sa Bogo pinanguluhan ni barangay kapitan Marilyn Daligdig.

Si Yeung sa maong suwat mipadayag sa kasagmuyo sa napatik sa lokal nga pamantalaan ug sa gi-upload sa internet nga video sa maong kalihukan tungod kay nakaguba kini sa ilang dungog. Sa maong video ug sa migawas nga report sa pamantalaan (di sa Banat News ug The Freeman) giingong nagpakitang gibendisyunan sa maong pari ang mga kandidato ug campaign materials sa mga Salimbangon.

Gihimakak sa mga Salimbangon nga mao kini ang nahitabo, sanglit prayer rally ra ug Thanksgiving ang nahitabo sa petisyon sa grupo ni Daligdig nga nag-awhag kang Yeung nga kini padaganon sa mayoralty race ug dili mga kandidato ug campaign materials.

Gihimakak ni Daligdig nga wala sila bendisyuni ni Dosado ang tanang placards kundili ang kadtong mga tawo nga mitambong sa misa maoy giwisikan og Holy water. Apan giklaro hinuon ni Mariqueta nga niadtong Disyembre 1, siya ug si Gobernador Gwendolyn Garcia mitambong sa Santos nga Misa lakip na ang iyang igsuong si Kongresista Benhur Salimbangon isip pagsanong sa hangyo sa katawhang Bogohanon.

Gitug-an usab niyang nakadawat na siya og pagpanghulga gikan sa wala magpailang caller nga daw naghulgang dunay mahitabo niya kun mohinayon og kandidato apan bisan paman niini dili siya mosibog sa iyang kandidatora. (Rey Pasaporte)        (BANATNEWS)