PRO-7: Pagbantay sa Pasigarbo di makaapektar  sa ubang police anti-criminality operations

CEBU, Philippines — Isip kabahin sa security preparations sa umaabot Pasigarbo sa Sugbo 2024 ang Police Regional Office(PRO)-7 milusad og laing hugna sa agresibong simultaneous anti-criminality operations gikan sa Agosto 19 hantod sa petsa 21, 2024 nga miresulta sa pagkasikop sa 320 ka mga suspetsado sa tibuok Probinsya sa Central Visayas.

Ang maong operasyon nakasikop sa 85 ka drug peddlers ug nasakmit ang 581.21 grams sa illegal nga drugas nga nagkantidad og dul-an P4 million ug ubang drug paraphernalia.

Gihingusgan sab sa PRO-7 ang ilang operasyon batok loose firearms nga miresulta sa pag recover sa 111 ka unregistered firearms nga makatabang aron mapakgang ang shooting incidents sa rehiyon ilabi na sa maong kalihukan.

Si PRO-7 Regional Director Brigadier General Anthony Aberin miingon nga bisan og wala'y na-monitor nga hulga apan wala nila gisalikway ang posibilidad nga ang mga kriminal mopahimulos sa kahigayunan dungan sa pagbutyag plastada na.

“These operations are intentionally launched to pave way for a secure landscape for the Pasigarbo sa Subo 2024.  We assure everyone that our comprehensive security is already in place and security forces will be deployed strategically across Central Visayas to prevent the occurrence of major crimes," ni Aberin pa.

Di Molugak

 Ang Cebu City Police Office(CCPO) nga maoy dunay hurisdiksyon sa Cebu City mipasalig nga bisan nakatutok sila sa pagbantay sa seguridad sa Pasigarbo sa Sugbo 2024 dili maapektuhan ang naandan nila nga anti-criminality campaign ilabi na nga long-weekend.

Si Police Lieutenant Colonel Maria Theresa Macatangay, Deputy City Director for Operations sa Cebu City Police Office miingon nga nakahan-ay na ang anti-criminality ug procedures sa siyudad sa Sugbo ug dili apektado sa deployment nila sa Pasigarbo sa Sugbo 2024.

Matud niya, ang magbantay sa seguridad sa Pasigarbo sa Sugbo 2024 nga mga polis sa siyudad tabangan sa ubang law enforcement agencies.

"As for the PNP compliment dili ra man ni taga Cebu City Police Office tanan, gilangkuban ni og other PNP personnel from other PNP units as well," asoy ni Macatangay.

Nasayran nga dunay gipakatap nga mga pulis ilabi na sa mga terminal aron masiguro nga luwas ang pag uli unya sa mga tawo sa ilang probinsya nunot na niining long weekend.

Lapu-Lapu City

Samtang ang mga nadakpan kasamtangan nga naa sa mga custodial facilities samtang giandam ang pagpasaka og tukmang kaso batok nila.

Sa Lapu-Lapu City, ang kapolisan sa siyudad nakasakmit og 195.6 gramo nga gituohang shabu nga mokabat sa P1, 330, 080.00 nga kantidad gikan High Value Individual (HVI) nga pusher nga ilang nadakpan sa buy bust operation nga gipahigayon sa Sitio Agus Proper sa Barangay Agus, Siyudad sa Lapu-Lapu alas 10 pasado ang takna sa miaging Huwebes sa gabii Agosto 23, 2024.

Si Police Lieutenant Colonel Christian Torres, tigpamaba sa LCPO miila sa ilang dinakpan nga mao si Dencio (apilyedo gipugngan) 36 anyos nga nagpuyo sa maong dapit.

Matud pa ni Torres nga ang buy bust operation nga gipahigayon sa mga sakop sa City Intelligence Unit (CIU) ug mga sakop sa City Drug Enforcement Unit (CDEU) uban sa Philippine Drug Enforcement Agency (PDEA) 7 basi sa nadawat nilang impormasyon labot sa ilegal nga kalihokan sa maong dinakpan sa maong lugar.

Nakuha gikan sa maong dinakpan atol sa iyang pagkasikop ang pito ka putos nga shabu uban sa boodle money nga gigamit sa puseur buyer sa pagpalit nga maoy hinungdan sa pagkasikop sa maong sudpetsado. —  IBM BANAT NEWS