Nagpatuong deboto, mga kawatan diay

CEBU, Philippines — Usa ka ginang nga nanagkot sulod sa Basilica Minore del Sto. Niño ang gikuotan sa iyang cellphone sa grupo sa mga mangunguot Miyerkules sa hapon, apan nakuha sa CCTV camera sa dagkotanan ang krimen ug nag trending kini karon sa social media.

Base sa kuha sa CCTV footage ang maong ginang kuyog sa batang anak nanagkot sulod sa Basilica.

Samtang siya nidagkot, niabot ang grupo sa mga tawo nga sa unang pagtan-aw managkotay sab og kandila ug gialirongan ang manag-inahan.

Dunay usa ka babayeng mitabon sa iyang kamot gamit ang kalo ug gisulod ang kamot ngadto sa bag sa babaye.

Ang iyang mga kauban nitabon ug nialirong sa maong ginang samtang ang ubang mga kauban nagpakaaron-ingong managkot sab.

Daw kilat ang kamot sa tambok nga ginang nga nikuot sa bag ug dali dali nga nitalikod ug nilakaw. Sa pagtalikod niadtong tambok nga babaye nitalikod sab ang mga kauban niini ug nag-iyahay og lakaw palayo.

Dihang nabantayan na sa ginang nga nawala iyang cellphone nangayo siya og tabang sa mga security guard apan wala na ang mga kawatan.

Sa imbestigasyon sa kapulisan matud pa ni Police Major Lynbert Yango, Hepe sa Waterfront Police Station,  nailhan na dayon nila ang lima sa unom ka nga mangunguot kay naa na silay rekord sa ilang buhatan.

Tungod sa nahitabo, gipahugtan sa Basilica ang monitoring sa mga tawo nga mosulod sa simbahan.

Matud pa sa Media Liaison sa Basilica Minore Del Sto. Niño Fr. Jules Van Almerez nga lisod ilhon ug hukman ang mga tawo nga mosulod sa simbahan ilabi na nga bukas kini alang sa tanan.

Ang kadagkuan sa Basilica nakig-alayon usab sa kapulisan alang sa dali nga kasulbaran sa kaso human nakahatag na usab sila og kuha sa CCTV sa maong panghitabo.

Ang kapulisan ug kaparian niawhag sa mga manimbahay nga mosulod sa simbahan nga magmatngon kanunay sa ilang mga butang. (BANAT NEWS)