Taxi driver, rider nakuhaag P11M shabu

CEBU, Philippines — Usa ka taxi driver ang nadakpan ug nakuhaan og mga binulto nga illegal nga drugas dihang nagpahigayon og buy-bust operation ang Provincial Intelligence Unit/Police Drug Enforcement Unit sa Cebu Police Provincial Office (CPPO) sa Purok Mohon 1, Barangay Langtad, dakbayan sa Naga alas 11 sa gabie sa adlaw'ng Miyerkules, Septiyembre 11, 2024.

Ang dinakpan mao si Jans Kristian Morales Deodor, 42 anyos, residente sa Barangay Tangil, Lungsod sa Dumanjug.  Nakuhaan ang suspetsado og 1,050 grams nga shabu nga nagkantidad og P7.1 milyones.

Nasayran nga courier sa illegal drugas ang suspetsado nga gipaubos sa kapulisan og tulo ka semana nga monitoring.

Nahibaw-an nga maka-dispose kini og duha ngadto sa tulo ka kilo nga ilegal nga drugas kada semana diin ang area of operation niini habig sa habagatang bahin sa Sugbo.

Samtang usa sab ka delivery rider ug iyang kauban ang gidakop sa Drug Enforcement Unit (DEU) sa Dakbayan sa Talisay diha sa Purok Matinabangon, Barangay Tabunok kagahapon sa kaadlawon.

Ang subject sa operasyon mao si Vincent Miñoza, 27, lumad nga taga sitio Quijano, Barangay Calamba, Syudad sa Sugbo.

Ang iyang kauban mao si Gerry Bansico, 47, nagpuyo sab sa sitio Quijano, Barangay Calamba, Syudad sa Sugbo.

Si Police Lt. Col. Epream Paguyod, hepe sa kapolisan sa Talisay nitataw nga gihimo nila ang buybust operation human ilang nadawat ang impormasyon sa distribusyon sa ilegal nga drugas.Wala na makadagan pa ang mga suspek human sila nakuptan sa mga operatiba. Nakuha gikan kanila ang shabu nga nitimbang og 625 gramos nga adunay gibana-bana nga balor nha P4,250,000.

Ang mga dinakpan gikatakdang pasakaan og kaso.  Ning semanaha lang, ang Police Regional Office-7 (PRO-7) nakasikop og 298 ka mga indibidwal tungod sa nagkalain-laing kalapasan sa balaod ug ordinansa ug nakasakmit og P17 milyones nga balor sa ilegal nga drugas sud sa tulo ka adlaw nga operasyon tibuok Central Visayas gikan niadtong Septiyembre 9 hangtod 12, 2024. Sa mga dinakpan, 103 ang mga drug suspects nga naglakip sa high-value ug street level nga mga indibidwal. Miabot tanan og 2,536.54 gramos nga gituohang shabu ang nasakmit.

Sa illegal gambling operations nasikop ang 111 ka mga tawo ug nasakmit ang PhP7,349.00 nga total bet money. Sa loose firearm operations, unom ka tawo ang nasikop ug 83 ka dili rehistradong armas ang nakuha sa kapolisan. Walo sab ka most wanted persons ug 70 ka laing wanted persons ang ilang nadakpan. — Romeo Marantal, Gie-Ann N. Tapic (BANAT NEWS)