Pekeng mga pahumot gisakmit

CEBU, Philippines — Laing mga tindahan na sab ang gironda sa mga tinugyanan sa National Bureau of Investigation National Capital Region us aka adlaw human duna sab silay girondang upat ka tindahan tungod sa pagpamaligya og pekeng razor blades.

Ning bag-o ang gironda sa NBI mao ang mga naninda og mga mini nga pahumot sa tindahan nga nahimutang sulod sa usa ka mall sa downtown area ug pipila ka mga tindahan ning dakbayan sa Sugbo.

Unang girumbo ang usa ka tindahan nga nag-abang sulod sa usa ka mall sa downtown area sa Cebu nga nag-display og mga nagkadaiyang produkto.

Lakip niini ang mga inila nga brand sa perfume nga maoy target sa search warrant sa NBI-NCR.

Nasakmit nila ang mga kinarton nga napuno sa mga pahumot nga gibaligya sa barato nga presyo kapin 100 pesos ang kantidad niini sa tindahan diin mokapin sa usa ka libo ang original.

Dungan usab nga gironda ang stall sa second floor sa maong mall nga nakuha usab ang mga kinarton sa susamang pahumot.

Managsama lang ang tag-iya sa mga pahumot nga gipamaligya sa Ground ug Second Floor sa gamay’ng mall diin wala na mohatag ug pamahayag ang nagdumala sa maong mga tindahan.

Si Atty. Lloyd Lara, ang Agent sa NBI-NCR nibutyag ang ilang operasyon gihimo basi sa reklamo nga gipaabot diha sa ilang buhatan mahitungod sa pagkopya sa identity sa ilang produkto nga pahumot apan dili mao ang sulod kay peke kini.

Dugang ni Lara, dili lang makadaut sa ekonomiya ilabi na sa mga tag-iya sa produkto kondili delikado usab kini sa panglawas kay wala man kini moagi sa proseso ug wala masusi sa Food and Drugs Administration (FDA).

Gituohan sa mga opisyal sa NBI-NCR nga moabot gihapon sa minilyon ang kantidad sa maong mga nasakmit nga pahumot. —  IBM BANAT NEWS