Mga dalan isirado atol sa Pasigarbo sa Sugbo

CEBU, Philippines — Ang Cebu City Police Office, Cebu City Disaster Risk Reduction and Management Office, Cebu City Transportation Office ug Provincial Planning and Development Office nipahigayon og final walkthrough kagahapon sa buntag sa rota sa street dancing sa Pasigarbo sa Sugbo 2024.

Si Police Lieutenant Colonel Maria Theresa Macatangay, deputy city director for operations sa Cebu City Police Office nagkanayon nga gitan-aw nila kon asang dapita ang posibleng adunay problema aron mahatagan nila og pagtagad.

Na-identify usab nila asa dapita ang dancing, props ug assembly area apil na ang dapit asa mo exit ug mo pick-up ang mga Local Government Unit sa ilang contingents.

Adunay mga dalan nga maapektohan sama sa R. Landon ug R. Landon Extension ug ang tibuok dalan sa Osmeña Boulevard.

"We were told that the road closure will be as early as 9:00 am but we will see if that is still the prevailing after our coordination meeting this 5:00 pm", matud ni Macatangay.

Hugot nga seguridad ang ipatuman sa kapolisan ilabi na nga adunay mga dagkong bisita ang motambong sa kalihokan karong Domingo.

Nasayran nga dul-an sa 2,000 ka security forces ang ipakatap nga gilangkuban sa kapolisan, Armed Forces of the Philippines, Bureau of Fire Protection ug uban pang mga ahensiya sa gobiyerno.

Giklaro ni Macatangay nga walay signal jam nga ipatuman ug nangayo usab sila og guidelines sa Cebu Provincial Government kalabot sa palisiya sa paggamit og drones atol sa kalihokan.

Ipatuman sa kapolisan sa Cebu City Sports Center ang “one entrance, one exit” sa contingents ug nakahan-ay na usab ang ilang sestema alang sa manan-away. Gidid-an ang mga mosulod sa Cebu City Sports Center nga magdala og mga mahait nga butang, ilimnong makahubog, pyrotechnics ug bisan unsang gamit nga makadaot sa mga tawo.

Subay niini, nagsugod na og abot sa Dakbayan sa Sugbo ang 50 ka mga contingents sa Pasigarbo sa Sugbo 2024.

Ang mga mananayaw sa Tribu Masadyaon sa Siyudad sa Toledo, Panuhog Festival sa Santa Fe, Toslob Festival sa Lungsod sa Oslob ug uban pa nga contingents nibiyahe gikan sa ilang mga lungsod niadto pang Agosto 22, 2024 padulong sa ilang tagsa-tagsa ka billeting quarters aron ipadayon ang pagpangandam sa umaabot nga kompetisyon karong Domingo. —  BDB BANAT NEWS