633 ka sugarol nangadakpan

CEBU, Philippines — Nadakpan ang 633 ka tawo sa 309 ka operasyon batok sa ilegal nga sugal nga gipahigayon sa mga police unit sa Central Visayas sulod sa Septiyembre, sumala sa Police Regional Office 7 (PRO7).

Gawas sa mga dinakpan, P76,258 nga kuwarta sa pusta ang nasakmit sa kapolisan atol sa maong mga operasyon.

Gitutokan sa mga police unit ang nagkalain-laing matang sa ilegal nga sugal sama sa illegal number games, card ug dice games, mahjong, cara y cruz ug ilegal nga sabong.

Matud sa PRO7, ang mga operasyon gipahigayon base sa nakumpirmang impormasyon ug gisunod ang mga protocol sa kapolisan sa pagpatuman sa balaod.

Padayon usab ang presensya sa mga police units sa mga lugar nga adunay mga report sa ilegal nga sugal aron masuta ang mga kalihokan ug maaksyonan dayun ang mga nalambigit niini.

Gipahimangnoan ni PRO7 Regional Director Police Brigadier General Arnold E. Abad ang mga operator ug partisipante sa ilegal nga sugal nga manubag sila sa balaod kung magpadayon sa maong kalihokan.

“To illegal gambling operators and participants: stop now or face the consequences under the law. PRO7 will continue decisive operations against these unlawful activities,” matud ni Abad.

Giawhag usab sa PRO7 ang publiko nga i-report ngadto sa pinakaduol nga police station ang mga gidudahang kalihokan sa ilegal nga sugal o motawag sa Hotline 911 aron dali kining masuta ug matubag sa kapolisan.

Matud sa PRO7, importante ang pakigtambayayong sa komunidad sa pagpadayon sa kampanya batok sa ilegal nga sugal ug sa pagpalig-on sa mga nahimong resulta sa mga operasyon.

Nahiuyon usab kini sa Focused Agenda on Enhanced Managing Police Operations (EMPO) sa Chief PNP nga nagtutok sa responsive ug accountable nga pagpatuman sa balaod.

Gawas sa mga sugarol, 432 ka tawo sad ang nasikop sa Police Regional Office-7 (PRO-7) sa mga operasyon batok sa nagkalain-laing kalapasan sa balaod sa Central Visayas sulod sa usa ka semana.

Gipahigayon ang maong mga operasyon gikan Septiyembre 27 hangtod Oktubre 3, 2026, diin 175 ka suspek ang nadakpan sa kampanya batok sa ilegal nga droga ug 952.84 gramos nga gituohang shabu ang nasakmit nga nagkantidad og P6,479,312 base sa Standard Drug Price (SDP).

Samtang, 80 ka wanted person ang nasikop sa mga operasyon sa PRO-7. Napulo ug siyam kanila ang mga Most Wanted Person samtang 61 ang Other Wanted Person.

Sa kampanya batok sa ilegal nga sugal, 143 ka tawo ang nadakpan ug P18,397 nga kuwarta sa pusta ang nasakmit sa kapolisan.

Nakarekober usab ang mga police unit og 56 ka wala marehistrong armas ug 34 ka tawo ang nadakpan may kalabotan niini.

Ubos sa OPLAN Katok, duha ka armas nga paso na ang lisensiya ug permit ang narekober sa kapolisan.

Matud ni   Abad, nagpakita nga kaning mga operasyon padayong paningkamot sa kapolisan aron mapadayon ang kalinaw ug kahapsay sa Central Visayas.

Gipasaligan ni Abad nga ipadayon sa PRO-7 ang pagpalig-on sa police presence ug mga operasyon batok sa mga hulga sa kalinaw ug kahapsay sa rehiyon.

Padayon usab ang PRO-7 sa kampanya batok sa krimen ug ilegal nga mga kalihokan subay sa tumong sa Philippine National Police nga “Bagong PNP Para sa Bagong Pilipinas: Serbisyong Mabilis, Tapat, at Nararamdaman.”—  IBM BANAT NEWS