Kampanya vs. stereo, extension seats, kolurom nga pasaheroan hingusgan

CEBU, Philippines - Subling hingusgan sa Land Transportation Office (LTO)-7 ang pagpanakop sa mga Public Utility Jeepney (PUJ) nga dunay mga stereo ug mga extension nga lingkoranan.

Matud ni LTO-7 Assistant regional director Ed Catarungan nga gidili ang pagtaod og mga car stereo ug extension nga lingkoranan sa mga jeepney nga nagbiyahian dinhi sa dakbayan ug Metro Cebu. Usa sa mga gitumbok nga peligro niini mao nga di makadungog ang mga drayber sa bosina sa ubang sakyanan, samtang ang extension seats makunsiderar nang paglapas sa loading capacity sa usa ka pasaheroan.

Gipasabot niini nga dunay total capacity ang usa ka PUJ busa dili maayong magbutang ang mga drayber og extension, pagkasuspenso sa prangkisa ang silot niini, matud pang Catarungan. 

Giawhag ni Catarungan ang sumasakay nga kun dunay mabantayang jeepney nga mihimo niini kinahanglan i-report dayon kanila pinaagi sa ilang hotline 09199558062.

Hingusgan usab sa LTO-7 ang paggukod sa mga ‘kolurom’ nga mga magbiyahian sa lalawigan sanglit niadto lang kalag-kalag nakadakop sila og tulo ka van gigamit pamasahero bisan walay prangkisa.  - Rey Pasaporte (BANAT NEWS)