San Fernando Police kuwa'g kahimanan

CEBU, Philippines – Gilista na sa bag-ong hepe sa kapolisan sa lungsod sa San Fernando ang mga ekipo nga gikinahanglan sa iyang buhatan aron makahatag kini og tukmang serbisyo ngadto sa katawhan.

Si Chief Inpsector Jovito Canlapan, kinsa mao na karon ang hepe sa San Fernando Police Station mibutyag sa Banat News nga kuwang siya og mga two-way radio, computer ug uban.

Si Canlapan kinsa maoy kanhi deputy police chief sa Talisay City Police Station maoy mihulip kang Senior Inspector Errol Francis Deveyra kinsa sa pagkakaron mao usab ang luyo-luyong hepe sa kapolisan sa Talisay.

Miingon si Canlapan nga paningkamotan niyang makabaton og hingpit nga kasangkapan ang iyang buhatan sa San Fernando aron mahisama kini sa ubang mga buhatan sa kapolisan sa lalawigan nga may kompleto nang mga kahimaman.

Ang San Fernando may 21 ka mga polis nga naglakip kang Canlapan ug maoy nagsilbi sa mokapin 60,000 ka molupyo. - Brenda D. Batuto (BANAT NEWS)