Gidagmalang mga tinun-an pakigkitaan sa taga DSWD

CEBU - Pakigtagbuan sa social worker sa Department of Social Welfare and Development (DSWD-7) ang mga ginikanan sa mga tinun-an sa Grade-IV sa Binabag Elementary School sa siyudad sa Bogo nga nangreklamo batuk sa gipasanginlang nanagmal nga Math subject teacher.

Ang maong magtutudlo giingong niparok sa ulo sa 10-anyos nga tinun-an ngadto sa blackboard;dunay uban mireklamong gihapak og chalk ug gipangbuwad sa init tungod kay wala sila makatubag sa leksyon niini.

Matud ni Vilma Rago sa operations division sa DWSD-7 dihang nahinabi sa Banat News nakig-alayon na sila karon sa social worker nga nagbase sa Bogo aron masusi ang reklamo.

Sutaon sa DSWD-7 kun gikinahanglan ba nga ipaubos sa stress briefing ug posibleng ipatan-aw sad sa usa ka psychologist ang mga tinun-an tungod sa trauma pagdagmal kanila.

Gitug-an ni Rago nga paabuton ug monitoron lang nila ang mamahimong resulta sa fact finding investigation sa Department of Education Dep-Ed-7 may labot sa maong reklamo.

Dunay 16 ka ginikanan ang mireklamo ngadto sa DepEd batok sa maong maestro ug mihangyong ipabalhin kini og laing dapit tungod sa maong hitabo. - Darrel Carumba (BANAT NEWS)