Polis nga nagdaling makapanagkot sa Naga gisungag og baka 'angol

CEBU - Usa ka polis nga nagdaling makadagkot og kandila sa sam-ang luwan sa iyang motorsiklo ang naaksidente human kalit gisungag sa baka diha sa sitio Angasil barangay Mactan dakbayan sa Lapulapu niadtong Domingo atol sa kalagkalag.

Ang biktima mao si PO3 Richard Alforque, 35, taga dakbayan sa Naga ug nadestino sa station 1 sa Isla sa Olango dakbayan sa Lapulapu.

Matud pa ni SPO1 Pablito Saldo sa Station 2 nga samtang gikan nga nag-duty sa sam-ang sa Isla sa Olango si PO3 Alforque nagdali kini og labang sa mainland sa dakbayan sa Lapulapu aron makaapas sa pagdagkot sa iyang mga kabanay nga gilubong sa dakbayan sa Naga.

Atol sa pag-agi niini sa usa ka hilit ug walay sugang dapit usa ka baka nga nagdagan ang kalit migawas sa usa ka eskina ug midiretso og sungag sa motorsiklo.

Gumikan niini nalamba ang maong polis sa dalan ug nakaangkon og mga bun-og sa kalawasan ug daling gidala sa mga tanod ngadto sa tambalanan.

Dihang gisubay ang dapit kung si kinsay nanag-iya og baka walay bisan usang miangkon, ang maong baka human sungaga ang polis daling mitago og balik sa ngitngit.

Matud pa ni Alforque nga dili siya makatoo nga gilamat lang siya niadtong tungura ug isipon niya kining di makalimtang hitabo sa iyang kinabuhi. (BANAT NEWS)