Casis nangolekta’g bayad sa nagpuyo sa Sugbu Homes

Mag-atubang unya og problema ang usa ka Magdalena Casis sa barangay Lahug ning siyudad sa Sugbu human itumbok sa mga sakop sa Veterans Drive Homeowners Association(VDHA) diha sa Sugbu Homes nga siya’y nangolekta  og bayad alang sa luna nga ilang giukopahan.

Labing minos 19 ka sakop sa nahisgutang homeowners association ang miluwat og pinanumpaang pamahayag ug giduso ngadto sa Local Housing board.

 Matud sa consultant sa Department for the Welfare of the Urban Poor (DWUP) sa City Hall nga si Charmae Pyl  Nercua nga mag-atubang unya og problema si Casis.

Kini tungod kay ang affidavit sa mga household member, ila nang gitugyan ngadto sa City Attorney’s Office alang sa tukmang lakang nga pagahimuon.

Ang pangutana ni Nercua kun nganong nangolekta si Casis og bayad nga ang luna nga giukopahan sa mga molupyo iya man sa kagamhanan sa dakbayan.

Sa pikas bahin, miingon si Nercua nga gihatagan sa board og laing duha ka semana nga lugway ang pagpatuman sa demolisyon diha sa VDHA.

 Lakip nga gihatagan og duha ka semanang lugway sa board mao ang mga household member sa 1321C Homeowners Association.

Kahinumdoman nga mokapin sa 90 ka mga molupyo sa nahisgutang duha ka homeowners association ang napadalhan na og demolition order niadtong miaging buwan.

Kini tungod kay sa pasiunang pakisusi nga gihimo sa DWUP, giingong ilegal nga mitukod og mga pinuy-anan ang nahisgotang mga mulopyo diha sa maong mga dapit.

Apan matud ni Nercua nga kini gihatagan og laing duha ka semanang lugway sa Local Housing Board alang usab sa subling pagpahigayon og beneficiary screening.

Lakip na usab niini ang subling pagpahigayon og technical survey uban sa National Housing Authority nga maoy naghimo sa subdivision plan diha sa Sugbu Homes.

Apan midugang si Nercua nga sa madugay ug sa madali, i-demolish gyud ang mga mulopyo diha sa nahisgutang mga lugar.

 Giklaro sa DWUP consultant nga kadto lang makapasar sa beneficiary screening maoy hatagan sa dakbayan og relocation site.