20% sa minors sud sa OSC nag-atubang dagkong krimen

Bayente porsento sa 116 ka mga minor de edad nga anaa sa Operation Second Chance ang nakahimog dagkong krimen sama sa pagpanglugos ug pagpatay, matud pa ni OSC Director Niel Avisado.

Hinuon gibutyag ni Avisado nga ang 80 porsiyento kanila nakahimo rag gaan-gaan nga salaod sama sa pagpanguot, pagsimhot og rugby ug pagpangawat.

Gani matud pa niya nga niining tanan 8 ra ka babaye ang kauban diin kasagaran sa ilang kaso mao ang pagpangawat kon "shoplifting" sa mga baligya sulod sa tindahan.

Sa kasong rape, si Avisado nagkanayon nga dili gyud sama ka grabe ang gihimo sa mga hamtong ang pagpanglugos nga gihimo ning mga batan-on ngadto sa ilang kaatbang nga sex.

Malagmit, matud pa ni Avisado nga maorag gipraktis-praktisan lang sa mga bata ang nakita nila sa mga salida sa sine, TV ug uban pang mga basahon nga law-ay.

Bisan diha sa pagpatay, sama sa murder ug homisidyo, gipakita lang sa maong mga minor de edad nga ang kasuko sa tawo wa mag-agad bata o tigulang ba siya.

Ang kaagrisibo lang sa mga batang mihimo niini maoy nagtukmod kanila sa pagbuhat sa maong krimen.

Matud pa ni Avisado nga sa pagkakaron ang anaa sa ilang poder may pangidarong gikan sa 11 anyos kutob 18.

Kining 18 anyos, imbis pagawason na, aron ibalhin ngadto sa ubang institusyon tungod kay lapas na siya sa pagka minor de edad, nagpabilin pa gihapon diha sa OSC tungod kay gipaabot pang kadesisyonan sa korte ang ilang kaso.

Gipaniguro usab ni Avisado nga kutob sa mapaslak nga minor de edad sa OSC may makat-onan gyud iniggawas, sanglit kay anaay taga DepEd, TESDA, Don Bosco, ug mga representante sa relihiyon nga manudlo sa mga bata alang sa ilang panginabuhi ug edukasyon ug relihiyon, para sa ilang ugma damlag.