Inspectors sa DOE wa magtarong inspeksiyon sa minahan - kabanay

Mga inspectors sa Department of Energy gipasanginlang wala magtarong sa ilang trabaho pag-inspeksyon sa minahan sa Ibalong Resources and Development Corporation maong nahitabo ang aksidente sa maong minahan diha sa Barangay Dumalan lungsod sa Dalaguete.

Usa sa mga kabanay sa naugkat nga patay'ng minero kagahapon ang mipasangil nga wala niya makit-i sukad ma sukad nga nanulod ang mga inspectors sa DOE sa tunnel matag dunay inspeksyon diha sa maong minahan.

Sumala pa niini sa pakighinabi sa sibyaanang DyLA nga mismong ang iyang amahang namatay misulti kaniya sa buhi pa kini nga delikado ang kahimtang sa sulod gumikan kay daghang kakulangon sa safety para sa mga minero.

Mireklamo usab ang ubang mga kabanay ug uban pang mga minero sa kakulang sa ventilation kun agianan sa hangin pasulod ug gawas. Dugang pa niini, ang giingong kahuyang sa mga kahoy nga maoy gibara-bara isip pugong aron dili mahulpa ang kisame sa carbon , dugang niini ang giingong kadug-ol sa matag 'RIS'.

Usa sa iyang gibutyag mao nga dug-ol ra kaayo ang mga RIS imbes nga 10 ka metros ang gintang niini, 5 metros raman maong kun dunay aksidente dali kaayong magtakod og kahugno.

Wala makit-i sa mga inspector kay gialegar nga dili mangadto sa site kay kutob ra sa Kilometer 21 ang lugar asa nahimutang ang opisina sa mga Taiwanese nga diin layo sa baba sa tunnel.

Gipanghimakak hinuon sa direktor sa Department of Energy 7 ang pasangil nga gipasagdan lang ug wala tarunga sa ilang inspectors ang pag-inspeksyon. Si Director Antonio Labios sa pakighinabi sa Banat News mibutyag nga dili tinuod ang mga pasangil gumikan kay sa labing ulahing inspection niadtong Septembre sa DOE walay nakitang peligro sa maong minahan ug gikatakda untang inspeksyonon karon untang bulana.

Apan ang mga inspectors matud pa ni Labios nauwahi lang og abot sa Ibalong gumikan kay unang gi-inspeksyon ang mga gagmay'ng minahan sa Argao.

Dugang pa niya nga kun duna may unang basulon mao ang mga safety engineers sa maong kompanya kay mao kini ang adlaw-adlaw nga naa sa minahan ug dili ang taga DOE.

"Dili na tinuod,normally mosulod gyud na ang atong mga inspectors otherwise dili nila makita ang sitwasyon, mosulod gyud na sila unless kung delikado," depensa pang Labios.

Gibutyag ni Labios nga makausa matag quarter sa tuig mao say pagpahigayon og inspeksyon sa maong minahan, giklaro niya nga mas may inadlaw-adlaw nga kasayuran sa sitwasyon ang mga safety engineers sa kompanya.

Matud pa niya nga kung duna pay nakitang deperensya ang mga inspector morekomendar kini dayon ngadto sa mining officer sa kompanya sa maayong buhaton aron makurehian ang mga kakulang o ba kaha awtomatikong mopasirado sa minahan kung gikinahanglan.

Si Labios miingon nga ang matag mining firm dunay kaugalingong "mining program" nga gisunod.

Apan iyang gipasalig nga mohimo og lawom nga imbestigasyon ang DOE kung dunay tulubagon ang Ibalong sa insidente, sumala pa niya nga subayon sa mga imbestigador ang mga gireklamo sa mga minero nga wala aksyuni sa kompanya ilabi na sa safety sa tunnel.