12 suspek sa tulis sa Landbank-Bogo gikiha na

Siyam ka mga suspek sa pagpanulis sa Land Bank of the Philippines sa Bogo gipasakaan na og kaso sa hiniusang puwersa sa Cebu Provincial Police Office ug National Bureau of Investigation.

Ang gipasakaan og kaso mao sila si Henry Cuerda, ex-army nga si Joseph Ancajas pulos mga taga Sitio Bong-aw, Cayang ug Taytayan District sa Bogo, Joel Sumabong sa Sitio Dawis, Barangay Banban,Dindo Ancero, taga Malingin, Ceferino Serbano taga Cogon ug usa ka naila lang sa ngan nga Partner pulos mga taga Bogo.

Lakip sa giapil mao ang laing unom ka John Does nga padayon pang giila.

Usa sa mga gipasakaan sa siyam mao ang ex-army nga si Joseph "Jojo" Ancajas, human kini positibong giila sa teller sa bangko samtang gibutyag nga laing duha ka kauban niini ang nailhan na apan ang uban gisubay pa karon sa kapolisan.

Si Ancajas nasikop sa entrapment sa mga sakop sa CIDG 7 niadtong milabay'ng tuig 2003 gumikan sa pagbaligya niini og mga bala nga iya sa militar ug gitaktak sa serbisyo ug nanimuyo na sa lungsod sa Bogo.

"As of yesterday (Miyerkules) the teller already executed an affidavit regarding the participation of the ex-army(Ancajas)," asoy pa ni CPPO Director, Sr. Supt. Bolodo sa mga tigbalita.

Hinuon si Ancajas kinsa nasikop diha sa Barangay Taytayan lungsod sa Bogo kusganong mihimakak sa pasangil. Gikaingong iyang igsuon ang janitor sa bangko nga si Favian Ancajas.

Midumili na sa paghatag og dugang detalye si Bolodo kalabot sa laing walo ka suspek sanglit gikabalak-an nga makaapekto unya kini sa mga tawong mihatag og impormasyon pagtudlo sa mga nalambigit.

Giklaro ni Bolodo nga walay news black out nga iyang giisyu, kini human mireklamo ang mga sakop sa media nga mikober sa istorya gumikan pagdeklarar ni C/Insp. Juanito Enguera og news blackout hinungdan sa nagkalainlaing pamahayag nga nanggula sa media bisan na ang mga dili pa kompirmadong mga report.

Sigun pa ni Bolodo naglikay lang ang kapolisan nga maapektuhan ang gihimong imbestigasyon ug gikasabutan sa CPPO ug NBI- 7 nga usahon ra ang mga pamahayag nga ihatag sa media.

Samtang nasuta nga ang narekober nga Nissan Vanette nga may plakang GLA-333 diha sa sulod sa giabandonang edipisyo sa Department of Public Works and Highways positibong gitumbok sa mga testigos nga maoy gisakyan sa mga nanulis.

Si Bolodo nagkanayon nga ang maong sakyanan narehistro didto sa Bulacan ug gidala lang dinhi human mapalit sa Filway Construction nga nagbase sa Cavite ug naay sangay sa Bogo.

Kasamtangan nang gihikay karon sa NBI ug CPPO ang dugang pakisusi sa mga kaubanan ni Ancajas