Gibo: POGOs, ‘national security concern’

MANILA, Philippines — Itinuturing ni Department of National Defense (DND) Secretary Gilbert Teodoro na isang “national security concern” ang Philippine Offshore Gaming Operator (POGO) sa bansa na ino-operate ng mga criminal syndicates.

Ito’y matapos na madiskubre sa pagsalakay sa mga POGO hub sa Porac, Pampanga ang Chinese military uniforms na may nakalagay sa botones na P.L.A (People’s Liberation Army) at ilang military pins.

Ngunit ayon kay PNP Public Information Office chief PCol. Jean Fajardo, ‘premature’ na sabihin na ang mga nasabing uniform ay mula China dahil sa kawalan ng ebidensiya.

Ayon kay Teodoro, ang lehitimong POGO ay nagsasagawa lamang ng online-betting para sa mga dayuhan sa ibang bansa.

“The concern is that we should stop these syndicated criminal activities operating out of our base, which weaken our financial standing, our country ratings, (and) corrupt our society,”ani Teodoro.

Subalit taliwas ito sa normal na operasyon ng POGO sa Porac dahil ginagawa ng mga sindikato ang pagpapanggap na POGO habang may ibang interes sa loob ng bansa.

Giit ng kalihim, kailangang ipatigil ang “syndicated criminal activities” na nag-o-operate sa loob ng bansa dahil bukod sa pinapahina nito ang financial standing, at country rating ng Pilipinas ay kino-korap nito ang lipunan.

Sa ngayon aniya ay pinag-aaralan na ng mga awtoridad ang mga ebidensya na nakuha sa POGO raid sa Pampanga at Tarlac kaugnay ng iligal na aktibidad ng mga ito.