ChatGPT batok sa kaalimuot
Nagpalaban ko sa ChatGPT unsaon sa mga tihik pagsagang ang grabeng kaalimuot sa way paggamit og electric fan ug aircon. Niang pipila lang sa nagbaha niyang mga rekomendasyon:
Sul-ob og luag, nipis ug luspad nga mga sapot; sigeng inom og tubig; higugmaa ang gaan ug sayon mahilis nga pagkaon, sama sa prutas ug utanon; likayi ang kape, softdrinks, ug bino kay makasamot sa dehydration; kaligo; gamit og basa nga toalya o labakara para sa imong liog ug agtang aron mabugnaw ang tibuok lawas; palaban og ice packs kon duna;
* * *
Makapabugnaw sa sulod sa balay ang pagbutang og sinako nga uling sa daplin; ituslob ang imong tiil sa balde sa tubig samtang maglingkod; menosi ang pagluto sa sulod; ayaw gamita ang oven o stove sa labing init nga mga oras; kat-oni ang pag-andam og bugnawng mga pagkaon; kon adlawan, pawonga ang mga bombilya kay makadugang sa kaigang; pawonga ang electronics ug appliances nga wa gamita;
Ablihi ang mga bintana ug mga pultahan sa managlahi nga bahin sa balay aron magsugat-sugat ang hangin; gamit og kurtina, o mas maayong amakan, aron pagsagang sa direktang siga sa adlaw; kon maatlan nga magtukod og bag-ong balay, pilia ang puti nga pintal aron mobanda ug di masuyop sa sulod ang kainit sa adlaw;
* * *
Pagbutang og mga lingkoranan sa gawas (dakong bentaha kon may kataoran og duyan) ubos sa landong sa punoan sa kahoy; pahimusling kabugnaw sa sayong buntag ug gabii aron mag-ehersisyo;
Ayaw himoang bug-at nga mga trabaho sa labing init nga mga oras; gamit og payong o lapad nga kawo (ayaw kalimting sunglasses) kon may lakwon sa gawas; kon kinahanglang mogawas sa pila ka oras, matag karon ug unya pasilong ug pahuway; tultola ang publikong mga lugar nga abunda og aircon sama sa shopping malls ug government ug private buildings;
* * *
Pasiriti ang imong nawong ug bukton sa spray bottle nga may bugnawng tubig; sige og susi sa mga timaan sa grabeng kakapoy, kauhaw, o pagkalipong ug dangop dayon og doktor kon simbako gikinahanglan na;
Pag-unlan og basa nga toalya aron bugnawng pagkatulog; gamit og nipis nga habol; ug kon makahigayon, makatabang ang pagkaligo sa dagat o swimming pool.
- Latest
