Kidlap-kidlap ang sulbad sa kakabos
Ang Eastern Visayas, diin nahimutang ang San Juanico bridge, maoy ikalima nga labing kabos sa tanang rehiyon sa nasud. Dul-an sa tunga sa milyon ka mga molupyo sa rehiyon ang di kapalit sa ilang inadlaw nga pagkaon.
Ang rehiyon nagkalisudlisod nang daan sa panahon pa sa diktadura ni anhing Ferdinand Marcos Sr. Padayong nabiyaan sa kalamboan sa ubang rehiyon bisan kon pabiling nidominar sa politika sa rehiyon ang pamilya ni kanhi unang ginang Imelda Romualdez Marcos ug ilang mga alyado. Ang sulbad sa administrasyon ni Presidente Ferdinand Marcos Jr.: Light ug sound show.
***
Ang Philippine Statistics Authority (PSA), ang opisyal nga tighipos ug tigtipig sa opisyal nga mga numero sa gobyerno, nga usahay tuohan ug usahay dudahan sab sa bag-ong presidente, nakaihap og 29 sa kada 100 ka indibiduwal sa Eastern Visayas ang di kapalit sa batakan nilang mga panginahanglan.
Sa kataposang ihap sa PSA sa niaging tuig, 1.39 milyones ka molupyo ang maglisod sa ilang inadlaw nga pagkaon, tambal ug ubang gastohan. Nagkinahanglan sila og dinaliang ayuda ug dugang kahigayonan sa panginabuhi. Ang tubag sa bag-ong administrasyon: P80 milyones nga light ug sound show ug P90 milyones nga boardwalk sa San Juanico bridge.
***
Labing daghan og pobre sa mga probinsiya sa rehiyon sa 2021: Eastern Samar (38 sa kada 100), Samar (34 sa kada 100), Leyte (29 sa kada 100), Biliran (27 sa kada 100), Northern Samar (26 sa kada 100), ug Southern Leyte (22 sa kada 100). Arang-arang lang og diyutay ang Tacloban City, ang sentro sa negosyo sa rehiyon (16 sa kada 100).
Tanyag nila sa bag-ong administrasyon: Light ug sound show nga mausab-usab agad sa okasyon.
***
Samtang di kasinahan ang tulipsayng programa sa atong silingan nga rehiyon, di ikapanghambog ang kahimtang sa atong kaugalingong probinsiya. Ang Sugbo nga maoy kinadatoan sa tibuok Pilipinas susama ang kalapad sa kakabos sa iwit nga probinsiya sa Eastern Visayas.
Ang 36 sa kada 100 ka molupyo sa probinsiya sa Sugbo ang labihang gamaya sa kita nga maglisod sa pagpalit sa labing importante nilang mga panginahanglan kada adlaw. Ambot giunsa paggasto ang dakong puntil sa probinsiya, nganong labihan mang lisora sa 1,197,139 ka Sugbuanon? [email protected]
- Latest
