Pagpasimang sa Santo Papa
Ambot kinsay responsable sa pag-usab sa tumong sa pagduaw sa Santo Papa sa Pilipinas unya sa sunod tuig. Sa makadaghan uyamot nga higayon, nituaw si Pope Francis sa dako niyang tinguha sa pakig-uban sa mga biktima sa sunudsunod nga katalagman sa Kabisay-an. Natandog kaayo siya sa kalapad sa kadaut nga gibilin sa linog sa Bohol ug Sugbo niadtong Oktubre 15 ug sa bagyong Yolanda sa silangang Kabisay-an ug amihanang Sugbo niadtong Nobyembre 8.
Nahibawo bang Santo Papa nga ang mga tigpasiugda nigahin lang og unom ka oras sa iyang pakig-uban sa mga biktima sa katalagman? Ug nga tanggungon siya sa Metro Manila sa labing dakong bahin sa upat ka adlaw niyang pagduaw?
***
Gawas sa iyang mga misa ug opisyal nga mga pamahayag sa Vatican nga pulos nipadayag sa iyang kahigwaos pag-unong sa mga biktima sa katalagman, ang mga representante ni Pope Francis nga niduaw sa Kabisay-an nipasalig nga nangita na lang sila og bakante sa iyang kalendaryo aron nga masaling-it ang iyang pagduaw.
May mga sugyot man gani nga mohapit siya sa Kabisay-an human sa iyang pagduaw sa South Korea niadtong Agosto ning tuiga. Apan ang bugtong nakit-an nga labing sayong kahigayonan pag-anhi sa Pilipinas mao ang Enero 15-19 sunod tuig human sa opisyal niyang pagduaw sa Sri Lanka sa Enero 12-15. Nganong wa man tahura ang orihinal nga katuyoan ni Pope Francis dinhi?
***
Gipahibawo na sa Catholic Bishops Conference of the Philippines (CBCP), nga nagbase sa kaulohan, ang pasiunang listahan sa kalihokan sa upat ka adlaw nga pagpabilin sa Santo Papa sa ilang nataran. Matod nila Tacloban City ug Palo ray iyang duawon sa Kabisay-an ug paadtuon na lang ang pinili nga mga tagtungod sa mga nangamatay sa linog sa Bohol ug sa bagyo sa amihanang Sugbo.
Mas abunda ang panahon nga ilang gitakda sa pagduaw sa Santo Papa sa mga simbahan ug mga eskuylahan sa Metro Manila. Nga ambot nahibawo bang Vatican, wa gyud katilaw og bisan gamay’ng kadaut sa linog ug bagyo.
***
Ambot may panahon pa ba pag-usab sa naumol nang plano sa CBCP ug sa kadagkoan sa Vatican, apan ang Santo Papa nabantog nga may kaugalingong panghunahuna ug di magpahigot sa burukrasya. Maong pasayloa kun sa kinauyokan nga bahin sa akong kasingkasing nagpabilin kong malaumon nga maapil ang Bohol ug Sugbo sa mga duawon ni Pope Francis. Palihug tuguti kong mopasabot:
•Napayaka ang daghang simbahan sa Bohol human sa linog apan wa molugak ang kahugot sa ilang pagtuo; ug
•May labot tingaling langit sa pagkaatol ang iyang pagduaw sa piyesta ni Senyor Sto. Nino nga nakahimo sa Sugbo nga duyan sa Kristiyanismo di lang sa Pilipinas kon dili sa tibuok gyu’ng Asya.
- Latest
