Kamanggihatagong way kinutoban

Human nahiagom sa grabeng kalisod sa pagpada sa mga hinabang sa manggihatagon nga mga Sugbuanon ngadto sa mga biktima sa linog sa Bohol, nangandoy ko nga makakaplag og sistema nga matag kadawat namo og hinabang may mosawo sab dayon pagtunol sa mga hinabang ngadto sa mga biktima. Akong nabatyagan nga natuman ni sa nagpadayong Kapamilya Relief Campaign alang sa mga biktima sa bagyong Yolanda.

Tungod ba kaha sa kaduol ug kasayon ra sa pagbiyahe sa naggusbat nga mga dakbayan ug kalungsoran sa amihanang Sugbo ug kasilinganang mga lalawigan sa Silangang Kabisay-an, labihang daghana nga nitanyag paghatod sa mga hinabang ug nagpaggamit sa ilang mga trak ug mga barko.

***

Nakapakumbinser gyod nako nga di na mi mabalaka nga matanggong og dugay ang mga hinabang mao ang labing uwahing tanyag sa tabang nga among nadawat--1,000-tonner nga barge nga among makargahan sa mga hinabang ug mada sa bisan unsang pantalan sa Sugbo, Leyte, Southern Leyte, Biliran ug mga lalawigan sa Samar, mga bodega sa mga dakbayan sa Mandaue ug Lapu-Lapu nga kapundohan ug kahimoan og repacking sa mga hinabang ug mga kargador nga makatabang pagsakwat sa labing bug-at nga sinakong mga hinabang.

Di kong katuo sa tinubdan sa tanyag--ang chairman ug chief executive officer sa San Miguel Corporation nga si Ramon Ang. Iyang mga tinugyanan mao pay nangapura nga makasugod na mi paggamit sa ilang kahimanan.

***

Wa hinuon molungtad og dugay ang among pagmaya. Tungod sa kadaghan sa mga sakyanan ug kapaspas sa paghakot sa mga hinabang ngadto sa Amihanang Sugbo ug Silangang Kabisay-an, dali rang nihiyos ang bungtod sa mga hinabang sa drop-off point sa Fuente Osmeña sa Dakbayan sa Sugbo ug sa ABS-CBN Broadcast Complex sa Jagobiao, Dakbayan sa Mandaue.

Kon mahurot nang mga hinabang sa mga trak pa lang gani, unsa na man lay mahibilin alang sa barge sa SMC? Mangandam na ba lang ming daan nga manlipaghong nga mangayo og pasaylo nga nasobrahan ra diay ang among kamasaligon nga molahutay ang mga hinabang?

***

Dayong udto natubag ang kabalaka. Higanteng trak gikan sa Dakbayan sa Zamboanga nga puno sa gi-repack nang tagduha ka kilong bugas, tulo ka delata ug upat ka putos sa noodles ang nibutho sa Jagobiao. Nangabot sang dugang hinabang gikan sa Santander ug ubang lagyong kalungsoran nga nakaipsot gikan sa kapintas ni Yolanda.

May napalitan na sab mi og gatosan ka sakong bugas ug nakabuylo na sang repacking sa gatosan namo ka boluntaryo. Relief operations sa Maribago Bluewater Beach Resort nga gipangulohan mismo ni Austrian Consul Julie Alegrado-Vergara nihapit sa mga barangay nga nangreklamong wa pa maabti og hinabang.

Pasayloa apan bisan unsa pay mahitabo di na ko magduda sa way kinutobang kamanggihatagon sa mga Sugbuanon.

***

Email: [email protected]