Binay ug Roxas pulos pakyas

Kining mga pasangil nga ang tanang tahas nga gisangon ni Presidente Noynoy Aquino kang DILG Secretary Mar Roxas pulos pakyas ug ang tanang tahas nga gisangon ni Aquino kang Bise Presidente Jejomar Binay pulos lampos nagsugod kapin sa duha ka tuig ang nilabay. Dihang dungan silang gipada ni Aquino sa duha ka managlahi nga mga tahas sa duha ka China:

Si Roxas napakyas paghupay sa kasuko sa kadagkoan sa Taiwan dihang gi-deport sa Pilipinas ang 14 ka Taiwanese nga gilambigit sa credit card scam ngadto sa Beijing inay sa Taipei; samtang si Binay nilampos pagkumbinser sa kadagkoan sa Beijing paglangay sa pagpahamtang sa silot nga kamatayon sa tulo ka Pinoy nga nakonbikto sa pagpayuhot og ilegal nga drugas.

***

Nadasonan ang pagtuo nga mas takos si Binay kay ni Roxas sa managlahing sangpotanan sa ilang mga tahas sa niaging semana: Samtang nilampos si Binay pagpapas sa silot nga kamatayon sa Overseas Filipino Worker nga si Dondon Lanuza sa Saudi Arabia, napakyas si Roxas sa paghusay sa krisis nga namugna sa pagpangatake sa mga sakop sa Moro National Liberation Front sa Dakbayan sa Zamboanga.

Nisamot ang bentaha ni Binay dayong tungang gabii niadtong Biyernes: Dihang nipahibawo si Binay og ceasefire tali sa MNLF ug Armadong Kusog human sa lima ka adlaw nga pakyas nga mga paningkamot ni Roxas pagsulbad sa krisis sa Zamboanga.

***

Apan nagpadayon ang pinusilay sa Zamboanga ug mas nigrabe pa pagka buntag sa Sabado. Klarong wa motuman si Chairman Nur Misuari sa MNLF sa iyang pasalig ni Binay nga mohunong na sa ilang pagpangrakrak aron kahatagan og kahigayonan ang malinawon nga sulbad sa krisis.

Inay manlipaghong sa kauwaw nilupad paingon sa Zamboanga si Binay. Gawas nga gisupak niya ang batakang lagda sa nasudnong seguridad nga di mahimong magkuyog sa usa ka dapit nga mahimong mameligro ang ilang kinabuhi, niinsistir pa gyod nga may pagtugot siyang Aquino sa pakigsabutsabot ni Misuari.

***

Mahimong wa magsulti sa tinuod si Binay sa iyang bersiyon sa iyang pagsud sa krisis sa Zamboanga. Kon tinuod pang gitugotan siyang Aquino pakigsabutsabot ni Misuari niadtong Miyerkules, nganong gibaraw man siyang Defense Secretary Voltaire Gazmin pagka Huwebes pinaagi sa pag-ingon nga nagsulti na silang Misuari ug Zamboanga City Mayor Beng Climaco? Kon gibutangan niya og mga pung ang baba ni Aquino unsa may atong garantiya nga wa niya butangi og mga pung ang baba ni Misuari?

Bugtong makalabaw sa sunudsunod nga kapakyas ni Roxas pagtuman sa iyang mga tahas maong kahigayonan nga namakak si Binay pag-angkon og kalamposan sa pagsulbad sa suliran nga gawas nga wa siyay labot mahimong mas nameligro pang mga sibilyan ug kasundalohan ug kapolisan tungod sa iyang wa kinahanglang pagsal-ot.

***

Email: [email protected]