Naga nihangayo nga mogamit sa Balili property

CEBU, Philippines — Gimando ni Gobernador Pamela Baricuatro ang pag-umol og Technical Working Group (TWG) aron susihon ang proposal sa kagamhanan sa Dakbayan sa Naga nga mogamit o makaangkon og bahin sa Balili property nga gipanag-iya sa kagamhanan sa Probinsiya sa Sugbo nga nahimutang diha sa Barangay Tinaan sa maong siyudad.

Pinaagi sa Executive Order No. 52 nga giluwatan niadtong Septiyembre 23, 2026 gisugo ang TWG sa paghimo og komprehensibong assessment sa hangyo sa Dakbayan sa Naga alang sa paggamit, pag-angkon, pag-abang, usufruct o ubang legal nga porma sa paggamit sa bahin sa maong property.

Ang proposal gisumite human nipahayag og interes si Naga City Mayor Valdemar Chiong nga gamiton ang bahin sa property alang sa economic zone nga gitumong sa pagdani og mga industriya ug pagmugna og trabaho alang sa mga residente.

Tipik sa EO nagkanayon nga “WHEREAS, the City Government of Naga, Cebu has formally manifested its interest in the use and/or acquisition of a portion of the Balili Property for local government and public service purposes”.

Apil ang maong proposal sa mas lapad nga development plan sa probinsiya alang sa Balili property diin giplanong tukoron ang integrated government, sports ug economic complex diha sa maong lugar.

Sayo pa, si Baricuatro nipadayag nga andam ang Kapitolyo sa pag-review sa development plan aron ma-accommodate ang proposal sa Naga samtang mapabilin ang mga proyekto nga giisip nga importante sa probinsiya.

Gipasabot usab sa gobernador nga kinahanglang makigtambayayong ang probinsiya sa host local government sa pagpatuman sa dagkong proyekto sa lugar. Ang TWG pangulohan ni Provincial Administrator Joseph “Ace” Durano, samtang si Sangguniang Panlalawigan Committee on Environmental Conservation and Natural Resources Chairman Stanley Caminero ang vice chairperson.

Lakip sa mga miyembro niini sila si Provincial Legal Officer Guiller Ceniza, Provincial Assessor Michelle Languido, PENRO representative Rodel Bontuyan, Cebu Provincial Investment and Promotions Division ug EEC Secretariat head Paulo Uy, PPDO representative Nerces Bispo ug SP Committee on Provincial/Municipal Properties Chairman Raymond Joseph Calderon.

Lakip sa mandato sa grupo ang pagtino sa hustong bahin sa property nga gihangyo sa Naga, pagsusi sa technical descriptions ug boundaries niini ug pagtan-aw kong compatible ba ang proposal sa kasamtangan ug umaabot nga mga programa sa probinsiya.

Susihon usab sa TWG ang legal nga kahimtang sa property, lakip ang ownership, title, encumbrances ug restrictions, ingon man ang valuation ug pinansiyal nga epekto sa bisan unsang posibleng transaksiyon.

Apil usab sa evaluation ang environmental, agricultural, food security ug socioeconomic impacts sa proposal ingon man ang pagtan-aw kong uyon ba kini sa mga development ug land-use plans sa probinsya.

Gitugotan usab ang grupo sa pagtuon kong ang angay nga arrangement mahimong usufruct, lease, joint undertaking, sale, transfer o laing legal nga porma sa paggamit.

Samtang gisusi ang proposal, nagpabiling bahin sa development plan ang Cebu Mega Food Hub nga gipadayag ni Baricuatro nga “non-negotiable” tungod sa papel niini sa food security sa probinsya.

Ang proyekto giplanohan og P1 bilyon nga pundo gikan sa Department of Agriculture diin ubos pa kini sa feasibility study. Ang mas lapad nga development concept sa site nga 45 hectares naglakip sa satellite provincial government center, sports ug economic facilities, food security infrastructure, fish port ug fish market, renewable energy components ug transport terminals.

Gipirmahan usab sa probinsiya ug MTD Philippines Inc. ang memorandum of understanding niadtong Mayo 19, 2026 aron sugdan ang feasibility study alang sa proyekto.  BDB BANAT NEWS