Baseload power requirements sa Negros ug Bohol gipas-an sa Cebu

CEBU, Philippines — Gipas-an sa Cebu ang bahin sa baseload power requirements sa Negros ug Bohol tungod sa mga pagdili sa duha ka probinsiya sa pagtukod og coal-fired ug diesel power plants, matud sa Cebu-based energy advocacy group nga nipahimangno nga nagdugang kini sa pressure sa napugos na’ng grid sa Visayas.

Giawhag sa Cebu Energy Rights Advocates (CERA) ang mga lider sa Negros ug Bohol nga repasohon ang ilang mga ordinansa tungod kay ang mga pagdili nakapabalhin sa bahin sa power-generation burden ngadto sa Cebu, Panay ug Leyte.

“Demand for power is shared by one Visayas grid. Therefore, the responsibility for the burden of baseload supply must also be shared”, matud ni CERA convenor Nathaniel Chua.

Ang provincial boards sa Negros Oriental, Bohol ug Negros Occidental nagpasa niadtong 2018 ug 2019 og mga ordinansa nga nagdili sa pagtukod og coal-fired ug diesel power plants sa ilang tagsa-tagsa ka hurisdiksiyon.

Matud ni Chua nga nakaamot kini sa pagsalig sa mga probinsiya sa kuryente’ng gikan sa ubang lugar ilabi na kong dili makatubag ang intermittent renewable sources sama sa solar power sa panginahanglan.

Kapin sa 950 megawatts (MW) ang installed capacity sa Negros apan kadaghanan niini gikan sa solar generation nga dili makahatag og kasaligan nga suplay panahon sa peak evening demand.

Matud sa CERA nga mga 240 MW lang sa baseload capacity ang anaa sa isla gikan sa Palinpinon geothermal plants, kompara sa peak demand nga moabot sa 450 MW.

Mas dako ang supply gap sa Bohol diin molapas sa 100 MW ang peak demand apan 26 ngadto sa 30 MW lang ang dependable in-island capacity.

Matud usab ni Chua nga kini nga mga kakulang sa suplay kasagarang gitubag sa coal-fired power plants sa Cebu ug Panay ug geothermal generation gikan sa Leyte.

Sa Cebu, nagkadako usab ang power requirement sa probinsiya diin nilapas na sa 1,000 MW ang peak demand niini samtang anaa sa mga 700 MW ang in-island generation capacity.

Gibana-bana sa CERA nga moabot sa mga 600 MW ang peak demand sa Panay sa ulahing bahin niining tuiga kompara sa mga 500 MW nga dependable in-island supply.

Ang Cebu ug Panay adunay mga bag-ong coal-fired power projects nga anaa sa pipeline.

Gipahimangnoan usab ni Chua nga sa umaabot mahimong mokunhod ang sobra nga geothermal power nga mahimong i-export sa Leyte ug Samar samtang molambo ang ilang ekonomiya ug mosaka ang lokal nga power demand.

Gibutyag ni Chua nga mas gipagrabe pa ang sitwasyon sa limitado nga kapasidad sa submarine transmission connections nga nagdugtong sa Visayas ngadto sa Luzon ug Mindanao.

Matud sa grupo nga ang kinatibuk-ang power demand sa Visayas anaa sa mga 2,400 MW.

Ang Samar-Leyte mao pa sa pagkakaron ang bugtong island group sa Visayas nga net exporter sa kuryente nga adunay mga 700 MW nga suplay kadaghanan niini geothermal kompara sa peak demand nga mga 310 MW.

Nipahimangno si Chua nga ang padayong pagsalig sa imported baseload electricity nga walay igo nga lokal nga 24-oras nga generation mahimong magpabug-at pa sa inter-island transmission facilities ug makadugang sa risgo sa mas lapad nga power shortages sa tibuok Visayas. BDB BANAT NEWS