Transport strike gipangandaman

CEBU, Philippines — Giandam na sa Kagamhanan sa Dakbayan sa Sugbo ang mga city-owned nga bus aron maserbisyohan ang mga tinun-an ug mga trabahante nga posibleng maapektuhan sa transport strike sa sub-transport sector karong adlawa, Setyembre 29, 2026 tungod sa padayong pagsaka sa presyo sa krudo ug palaliton.

Matud ni Kenneth Siasar kinsa chief of staff ni Mayor Nestor Archival nga posibleng gamiton ang 15 ka green buses nga gipanag-iya sa siyudad apan magdepende gihapon ang aktuwal nga pagpakatap sa mga unit nga bakanteng gamiton tungod kay adunay mga naunang hangyo alang sa serbisyo niini.

Posibleng sugdan alas- 6  sa buntag ang pagpakatap sa mga bus tungod kay kasagaran ang mga tunghaan magsugod ang klase sa alas 7:00 sa buntag.  Ang katapusang pagbiyahe sa mga bus anaa sa alas 8:00 sa gabii.

Ang mga rota sa bus mao ang Bulacao-Colon vice versa, Guadalupe-Colon vice versa, Talamban-Colon vice versa.

 Moagi sab kini sa Bulacao, N. Bacalso Avenue, P. del Rosario, Day-as, Colon, Guadalupe, Petron Guadalupe, V. Rama, CCMC, E-Mall ug Leon Kilat.

Sa norte, ang rota sa mga bus moagi sa Ban-Tal Road, Ayala Center Cebu, M.J. Cuenco Avenue ug Colon.

Gihangyo usab sa kagamhanan ang mga tunghaan nga kung mahimo, gamiton ang ilang kaugalingong school bus aron  makatabang sa paghatod sa mga tinun-an.

Gikonsiderar usab sa siyudad ang posibilidad sa pagkanselar o pagsuspenso sa face-to-face classes, apan wala pa kini pormal nga anunsyo tungod kay mokonsulta pa ang kagamhanan sa mga tunghaan sa dili pa mohimo og desisyon.

Usa sa mga gikonsiderar mao ang epekto sa sunod-sunod nga kanselasyon sa klase  tungod sa haze, ug ang posibilidad nga maapektuhan ang mga gikatakda nga eksaminasyon ug school calendar.

Alang sa seguridad, si Siasar miingon nga gipatawag sa mayor ang Philippine National Police (PNP) alang sa koordinasyon ug foot patrols sa mga eskuylahan ug sa kadalanan.— IBM BANAT NEWS