Tulo gidaro sa Montero

CEBU, Philippines — Tulo ka pedestrian, lakip ang usa ka 8-anyos nga batang lalaki, ang naangol  human silang gibanggaan sa usa ka Mitsubishi Montero samtang naglakaw sa kilid sa M.L. Quezon National Highway sa Barangay Marigondon, Lapu-Lapu City, alas 8:55 sa gabii niadtong Septiyembre 27, 2026.

Ang mga biktima mao si Rion Bryn Sullano Macarat, 8, si Neil Jonathan Soliano Hernandez, 39, ug si Gladys Malubay Sullano, 40, pawang residente sa Atabay, Barangay Agus, Lapu-Lapu City. Base sa inisyal nga imbestigasyon sa Lapu-Lapu City Police Office Traffic Enforcement Unit (TEU), naglakaw ang tulo sa kilid sa dalan padulong sa Marigondon Junction dihang gibanggaan sila sa Montero nga nagsunod kanila.

Makita nga kalit kaayo ang nahitabo, nangalagpot ang mga biktima sa karsada gani ang bata nalagpot ug nalamba sa poste sa kilid sa dalan.

Apan imbes mohunong para tabangan ang mga biktima milahus  ang drayber og padagan ug midiretso og palayo.

Ikaduha na kini ka higayon sa Lapu-Lapu City ning tuiga nga naay gi-hit and run og pribadong sakyanan.

Gidala ang tulo sa Lapu-Lapu City District Hospital alang sa medikal nga pag-atiman.

Ang nalambigit nga sakyanan usa ka gray o silver nga Mitsubishi Montero nga may plakang NDB 5491, apan wala pa mailhi ang drayber.

Padayon ang pagpangita sa kapulisan sa drayber nga mikagiw human sa insidente.

Gipanawagan ni Police Corporal Dhieson P. Bolambao, investigator sa kaso, ang publiko, ilabi na ang mga nakasaksi o adunay impormasyon kabahin sa insidente, nga motabang sa pag-ila sa drayber pinaagi sa pag-coordinate sa Lapu-Lapu City TEU.

Gihangyo usab ni Lapu-Lapu City Lone District Rep. Junard “Ahong” Chan ang publiko pinaagi sa iyang Facebook post nga motabang sa mga otoridad sa pag-ila ug pagpangita sa drayber.

Si Chan sa iyang post sa Facebook, niingon nga talandugon ang kahimtang sa babaye ug nanawagan siya sa publiko kung naay nakaila sa drayber sa maong SUV ug isumbong kini sa mga otoridad.

Girekord sa kapulisan ang insidente isip reckless imprudence resulting in multiple physical injuries, nga traffic-related incident ug hit-and-run.

Usa sa nabantayan sa lugar mao nga walay sidewalk nga maagian ang mga pedestrians tungod sa mga tindahan nga diha na nagtungtong sa sidewalks.—  IBM BANAT NEWS