Matibag, mga tigbalita gikasohan ni Rep. Duterte

CEBU, Philippines — Nipasaka og kaso nga libel ug cyber libel si Rep. Paolo Duterte (Davao City, 1st District) kagahapon, Biyernes, Oktobre 23, batok kang National Bureau of Investigation Director Melvin Matibag, gitaktak nga polis nga si Rodulfo Gracioso Jr. ug daghang GMA Network journalists tungod sa pagbalita nila sa mga gipasangil kaniya ni Gracioso nga gihatdan siya niini og maleta-maletang kwarta.

Ang kaso gisang-at ni Duterte sa Office of the City Prosecutor sa Davao City batok nilang GMA Network chairman Felipe Gozon, president and chief executive Gilberto Duavit Jr., 24 Oras anchors Mel Tiangco, Vicky Morales, Emil Sumangil, Darlene Cay, Marvin Parado ug Joel San Luis, ug wala mailhing mga “John and Jane Does.”   Ang abogado si Duterte nga si Peter Paul Danao, nikompirmar sa Philstar.com  nga ang kaso may kalabotan ni sa September 25 episode sa 24 Oras, nga nipagawas sa pre-recorded interviews nilang Gracioso ug Matibag. 

Ang GMA Network niingon nga wala pa silay nadawat nga kopya sa reklamo.  Samtang si Matibag sa usa ka ambush interview niingon nga katungod ni Duterte nga mosang-at og reklamo.

Ang GMA mao ang unang ni-report bahin sa affidavit ni Gracioso, nga kanhi security aide ni former House Speaker Lord Allan Velasco.  Nialegar si Gracioso iyang affidavit nga gihatdan niya og maleta-maletang kwarta silang Vice President Sara Duterte, iyang amahan nga si kanhi presidente Rodrigo Duterte ug igsuon nga si Rep. Pulong Duterta subay sa mando ni Velasco. Matud pang Gracioso, kapin sa P2 bilyones ka pesos ang iyang nahatud kang Vice President Sara Duterte, P1 billion kang Digung Duterte, ug P100 million kang Pulong.

Silang VP Sara ug Pulong kusganong nihimakak sa mga alegasyon kanila ni Gracioso.

Matud pang Matibag "99 percent" nga tinuod ang gipangsulti ni Gracioso basis a polygraph tests sa NBI may kalabotan sa ilang nagpadayung imbestigasyon.

Ang libel dunay silot ubos sa Revised Penal Code, samtang ang cyber libel, mao ang pagpakauwaw ginamit ang computer system ug duna kini silot ubos sa Cybercrime Prevention Act of 2012 nga mas bug-at sa libel.

Daan ng gikaalarma sa mga press freedom groups ang paggamit sa cyberlibel batok sa mga Filipino nga tigbalita ilabi na sa panahon ni kanhi presidente Duterte aron pahilumon ug hudlaton ang mga tigbalita nga moestorya og mga bati batok kaniya.

Bisan ang Commission on Human Rights sa gobiyerno niingon nga gi-weaponized ang cybercrime law ug ang RPC araon pahilumon ang mga kritiko sa gobiyerno. Gikan sa Philstar.com, IBM BANAT NEWS