Pagtibugsok ni Imee
Dili normal ang reaksiyon ni Senador Imee Marcos dihang gipahibawo nga peke ang dokumento nga iyang giwara-wara sa duha na niya ka public hearings isip usa sa mga sukaranan sa iyang pagkuwestiyon sa pagtunol ni kanhi Presidente Rodrigo Duterte ngadto sa International Criminal Court (ICC).
Imbes ma-alarma nga nalutsan og binuang ang iyang komitiba, imbes magsusi kon kinsa ang naghatag nila sa sayop nga ebidensiya, imbes mopa-imbestigar kinsa sa iyang mga trabahante sa Senado ang nisabotahe sa iyang imbestigasyon, gisalikway ang papel kansang importansiya iyang gipaburot sukad sa niaging semana.
* * *
Nabiktima ba sab si Imee sa giingon ni Executive Secretary Lucas Bersamin nga pabrika sa fake news sa kampong Duterte? Nagsalig bang mga tigpaluyo ni Duterte nga tungod sa iyang ka-desperada mokubit bisan unsay ilang ilawog?
O kabahin siya sa lapad nga kampanya sa pagpangilad? Apil ba siya sa mga arkitekto sa paglubag sa dakong kadaogan sa kampanya sa hustisya sa mga pamilya sa mga biktima sa extrajudicial killings ni Duterte? Kabahin bang iyang imbestigasyon sa Senado sa maniobra pagpamugos pagpintal sa berdugo nga maoy biktima sa inhustisya?
* * *
Laing posibleng pamakak ni Imee sa iyang imbestigasyon: Gisalikway sa Bureau of Immigration (BI) ang iyang pangangkon nga gikan nila ang mga dokumento nga niila sa mga imbestigador sa ICC nga niduaw sa nasud sa niaging tuig.
Matud sa BI wala silay kasayuran kon ang mga langyaw nga ginganlan ni Imee mga sakop ba gyod sa ICC. Nagtuo ba si Imee nga human sa iyang pelikulang ‘Maid in Malacañang’ moyango na lang ang publiko bisan unsay iyang istorya?
* * *
Usa ka adlaw human nabantang sa survey sa OCTA nga ang pagsipsip sa mga Duterte nipahagsa imbes motabang sa iyang kandidatura, gipagawas sa Pulse Asia ang mas bag-ong survey nga dili makapaluya niya.
Gawas nga natagak (ika-17 siya sa Marso gikan sa ika-14 sa Pebrero), naapsan na nilang Phillip Salvador (ika-13 sa Marso gikan sa ika-18 sa Pebrero), Bam Aquino (ika-15 sa Pebrero ug Marso) ug Rodante Marcoleta (ika-16 sa Marso gikan sa ika-21 sa Pebrero). Bugtong konsuylo: Nahagbong uban niya ang nisipsip sab sa mga Duterte nga si Camille Villar (ika-14 sa Marso gikan sa ika-12 sa Pebrero).
* * *
- Latest
