Drug dealer timbog P8.1 milyon shabu sa Zamboanga
COTABATO CITY, Philippines — Nasamsam ng mga pulis ang may P8.1 milyon na halaga ng shabu sa isang hinihinalang drug dealer sa ikinasang buy-bust operation sa Barangay Sinunuc sa Zamboanga City nitong madaling araw ng Biyernes, May 24, 2024.
Sa mga hiwalay na ulat ng Zamboanga City Police Office at ng Police Regional Office-9, agad na inaresto ng mga hindi unipormadong mga pulis ang suspect, si Jul-Akmad Abbo Eling, 36-anyos, matapos silang bentahan ng 1.2 kilo ng shabu, nagkakahalaga ng P8.1 milyon sa isinagawang drug operation sa Upper HB Home sa Barangay Sinunuc.
Ayon kay Police Brig. Gen. Bowenn Joey Masauding, director ng PRO-9, naikasa ang naturang entrapment sa tulong ng tanggapan ni Mayor John Dalipe, chairperson ng Zamboanga City Peace and Order Council.
Nahaharap na si Eling sa kasong paglabag sa Comprehensive Dangerous Drugs Act of 2002, ayon kay Masauding.
Inaalam na rin ng mga intelligence agents ng PRO-9 kung sino ang mga contacts ni Eling sa Zamboanga City at mga kalapit na probinsya sa Region 9 at sa Bangsamoro region.
- Latest
