‘Pusher’ utas sa shootout
CAVITE , Philippines — Isang hinihinalang tulak ng droga ang napatay matapos umanong kumasa sa mga awtoridad sa isinagawang buy-bust operation sa Brgy. Salawag, Dasmariñas City kamakalawa ng gabi.
Kinilala ni P/Supt. Alvin Ruby Consolacion, hepe ng Dasmariñas City Police, ang napatay na suspek na si Arnel Pakingan alyas “Arnel”, nasa hustong gulang, residente ng nasabing lugar.
Sa imbestigasyon ng pulisya, alas-11:30 ng gabi nang ikasa ng elemento ng CDEU Dasmariñas ang buy-bust operation sa tirahan ng suspek sa Blk. 34 Golden City. Dasma 3, Brgy. Salawag.
Isang pulis ang nagpanggap na buyer at bumili sa suspek ng shabu. Nang maiabot na ng suspek ang nasabing droga, agad na nagpakilalang pulis ang ka-deal nito at nang akmang poposasan ang suspek ay pumalag at mabilis na nagtatakbo. Dito, nagkaroon ng habulan at palitan ng putok hanggang sa duguang tumimbuwang ang suspek.
Narekober sa lugar ang 2 fired cartridges ng ‘di pa malamang kalibre ng baril, 1 pistola na may mga bala, 2 magazine na may mga bala; 1 sachet ng shabu; glass pipe; at may nakuha pa sa bulsa ng suspek na 10 plastic sachet na naglalaman ng mga shabu.
- Latest
