3 kritikal sa pamamaril ng senglot

CAMP SIMEON OLA, Legazpi City ,Philippines  –Tatlo-katao ang malubhang nasugatan matapos tamaan ng ligaw na bala mula sa nag-amok na senglot sa sayawan sa Barangay Bani sa bayan ng Tinambac, Camarines Sur kahapon ng madaling araw. Ang mga biktimang naisugod sa Tinambac Infrimary Hospital ay sina Pio Sales, 35; Diane Gianan, 14; at si Judith Cantor, 53. Samantala ang suspek na kaagad naman na nasakote ng pulisya ay kinilalang si Ryan Tuy, 25. Base sa ulat ng pulisya, bago mamaril ang suspek ay sinuntok muna nito si Rowell Sales, 28. Dito na nagkagulo kung saan hinampas ng silya ng utol ni Sales ang suspek na lango sa alak kaya ito namaril sa loob ng sayawan. Lumilitaw na ang suspek ay may personal na galit kay Sales kaya sinasabing naghiganti ito.